لاہور: پاکستان مسلم لیگ ن کی جانب سے وزیر اعلیٰ پنجاب کو ان کے عہدے پر بحال کرنے کے ہائیکورٹ کے فیصلے کو سپریم کورٹ میں چیلنج کرنے کا امکان ہے۔
تفصیلات کے مطابق وزیر اعظم شہباز شریف کی زیر صدارت مسلم لیگ ن کا اجلاس ہوا، اجلاس میں وفاقی وزرا رانا ثنا اللہ، اعظم نذیر تارڑ، سعد رفیق، عطا اللہ تارڑ اور ملک احمد نے شرکت کی۔
اجلاس میں پنجاب کی سیاسی صورتحال پر تبادلہ خیال کیا گیا اور ہائیکورٹ کے فیصلے پر تحفظات کا اظہار کیا گیا۔
ذرائع کا کہنا ہے کہ اجلاس میں قانونی ماہرین سے مشاورت کر کے معاملے کو سپریم کوٹ میں چیلنج کرنے کا فیصلہ کیا گیا ہے۔
ذرائع کے مطابق اجلاس میں کہا گیا کہ وزیر اعلیٰ کو مکمل اختیارات دینے کا مطلب ہارس ٹریڈنگ ہوگی، تحریک انصاف اور مسلم لیگ ق کے ناراض ارکان کو اضافی فنڈز دے کر اعتماد کا ووٹ لینے کے لیے آمادہ کیا جائے گا۔
اجلاس میں فیصلہ کیا گیا کہ عدالت عالیہ سے فیصلے پر نظر ثانی کرنے کی اپیل کی جائے گی۔ وزیر اعظم شہباز شریف نے اپیل سے پہلے قانونی ماہرین سے مشاورت کی بھی ہدایت کر دی۔
