اسلام آباد : وزیراعظم شہباز شریف نے ریٹنگ ایجنسی موڈیزکی جانب سے پاکستان کی کریڈٹ ریٹنگ اپ گریڈکرنے پر اظہار اطمینان کرتے ہوئے کہا معیشت استحکام کے بعد ترقی کی جانب گامزن ہے۔
تفصیلات کے مطابق وزیر اعظم شہباز شریف کی زیر صدارت ملکی معیشت کی ترقی اور سرمایہ کاری کے حوالے سے اقدامات پرجائزہ اجلاس ہوا۔
اجلاس میں وزیراعظم نے ریٹنگ ایجنسی موڈیزکی جانب سے پاکستان کی کریڈٹ ریٹنگ اپ گریڈ کرنے پر اظہار اطمینان کرتے ہوئے کہا کہ اللہ کے فضل و کرم سےمعاشی ٹیم کی کوششیں رنگ لا رہی ہیں۔
ان کا کہنا تھا کہ گزشتہ دور حکومت میں ملک کی خاطر اپنی سیاست کی قربانی دی، قومی مفادات کوسیاسی مصلحتوں پر ترجیح دینے کی پالیسی اپنائی، ڈیفالٹ سے بچایا، معیشت استحکام کے بعد ترقی کی جانب گامزن ہے۔
وزیراعظم نے کہا کہ حکومتی پالیسی کےمثبت اثرات اب معیشت پر نظر آنےلگےہیں، امیدہےمعیشت اسی رفتارسےمثبت سمت میں آگےبڑھتی رہےگی۔
انھوں نے مزید بتایا کہ پاکستان کوسی اے اے ٹوریٹنگ دیاجاناپالیسیوں کےدرست ہونےکابین الاقوامی اعتراف ہے، مجموعی معاشی بہترصورت حال کےحوالےسےوزیرخزانہ،ٹیم کی کوششیں لائق تحسین ہیں۔
وزیراعظم کا کہنا تھا کہ دوست ممالک کا سرمایہ کاری میں اظہار دلچسپی کاروبار وسرمایہ کاری دوست پالیسیوں کا نتیجہ ہے، دوست ممالک سے سرمایہ کاری کے منصوبوں پر عملدرآمد میں کسی قسم کی سست روی قبول نہیں، تمام وزرا، متعلقہ ادارے مجوزہ منصوبوں پر پیش رفت کو تیز بنانے کیلئے اقدامات کریں۔
اجلاس کوسی پیک کےدوسرے مرحلے کے تحت منصوبوں پر پیش رفت سے بھی آگاہ کیا گیا۔
