کراچی : وزیر اعظم شہباز شریف کا کہنا ہے کہ معاشی بہتری کیلئے سب کیساتھ مل بیٹھنے کیلئے تیار ہوں تاہم وقت آنے پر آئی ایم ایف کو ہمیشہ کیلئے خدا حافظ کہہ دیں گے۔
تفصیلات کے مطابق وزیراعظم شہباز شریف نے پاکستان اسٹاک ایکسچینج کے دورے کے موقع پر خطاب میں کہا کہ اسٹاک ایکسچینج کی کارکردگی سے ملک میں استحکام آیا ہے، اسٹاک مارکیٹ کی بہترین کارکردگی پر سب کو مبارکبادپیش کرتا ہوں۔
وزیراعظم کا کہنا تھا کہ پہلی بار اسٹاک مارکیٹ کا دورہ کرنےپر خوشی ہوئی، معاشی ترقی کے سفر کا آغاز ہوچکا ہے، پاکستان کی معیشت دوبارہ سے اپنے قدموں پر کھڑی ہورہی ہے، اب ہمیں گروتھ کی طرف بڑھنا ہے۔
انھوں نے کہا کہ آپ آئیں بیٹھیں اور بتائیں کس طرح معیشت کو اوپر لیکر جائیں، معاشی نمو کیلئے بہترین ٹیم ورک کی ضرورت ہے، کراچی روشنی کا شہر ہے ایک زمانے میں اسکی روشنیاں ختم ہوچکی تھیں۔
شہباز شریف نے بتایا کہ اڑان پاکستان پروگرام شروع کیاگیاہے، ماضی میں بھی آپ نے بہت سے پروگرام دیکھے ہیں، اب ہمیں گروتھ کی طرف بڑھناہے، جتنا آپ کو تجربہ ہے شاید اتنا تجربہ کسی اور علاقے کے لوگوں میں نہ ہو، لاہور، کوئٹہ، پشاور کے ایکسپرٹ بھی بیٹھیں اور تجاویزدیں، میں آپ کو جلد دعوت دوں گا کھلے دل سے میٹھی، تلخ باتیں سنوں گا۔
وزیراعظم کا کہنا تھا کہ وقت آنے پر آئی ایم ایف کو ہمیشہ کیلئے گڈ بائی کہیں گے، اسوقت ہم آئی ایم ایف پروگرام میں ہیں ان کی کمٹمنٹ کو پورا کرنا ہے۔
انھوں نے پیشکش دیتے ہوئے کہا کہ معاشی بہتری کیلئے سب کیساتھ مل بیٹھنے کو تیارہوں ، ملک کی معیشت کو آگے لےجانے کیلئے سرمایہ کاری چاہیے، پاکستان قیامت تک زندہ رہے گاہ میں اسے مضبوط کرنا ہے۔
شرح سود کے حوالے سے وزیراعظم نے کہا کہ پالیسی ریٹ13 فیصد پرآگئی ہے اب بھی 8پوائنٹس کمی کی گنجائش ہے، میں تو چاہوں گا شرح سود مزید کم ہوکر 6فیصد پر آجائے۔
انھوں نے مزید بتایا کہ دہائیوں سے خام مال پاکستان سے جارہا ہے لیکن کوئی چیک اینڈ بیلنس نہیں، ہماری خواہش ہے کہ سیمی فنشد گڈز ایکسپورٹ کریں، کل مغرب سےایک ٹیم آئی ہوئی تھی انہوں نے کہا ہم ٹیم لیکر آتے ہیں، انہوں نے کہا آپ کے دفن خزانے ایکسپوز کریں گے ، دہائیوں سے را مٹیریل جا رہا ہے پتا نہیں وہ کتنا لیکر جاتے ہیں۔
