وزیراعظم شہباز شریف وزیراعلیٰ ہاؤس پہنچ گئے جہاں انہوں نے وزیراعلیٰ سندھ سید مراد علی شاہ کو یقین دہانی کرا دی ہے۔
اے آر وائی نیوز کے مطابق وزیراعظم شہباز شریف وزیراعلیٰ ہاؤس پہنچ گئے ہیں جہاں انہوں نے مراد علی شاہ کے ہمراہ اجلاس کی صدارت کی جس میں وفاقی حکومت کے ساتھ ترقیاتی کاموں ودیگر مسائل پر گفتگو کی گئی۔
ترجمان وزیراعلیٰ ہاؤس کا کہنا ہے کہ اس موقع پر وزیراعلیٰ سندھ نے وزیراعظم سے کٹوتیوں کے بعد فنڈز واپس نہ ہونے کے معاملے پر بھی بات چیت کی۔
وزیراعظم شہباز شریف نے وزیراعلیٰ سندھ کو تمام مسائل مل بیٹھ کر حل کرنے کی یقین دہانی کراتے ہوئے کہا کہ ہم مل جل کر عوام کے مسائل ترجیحی بنیادوں پر حل کریں گے۔
دوسری جانب ذرائع کا کہنا ہے کہ وزیراعظم شہباز شریف سہ پہر 3 بجے گورنر ہاؤس پہنچیں گے جہاں وہ گورنر سندھ کامران ٹیسوری سے ملاقات کریں گے۔
وزیراعظم مقامی ہوٹل میں بزنس فورم سے بھی خطاب کریں گے۔
واضح رہے کہ وزیراعظم شہباز شریف ایک روزہ دورے پر کراچی پہنچے۔ انہوں نے مزار قائد پر حاضری دی اور مہمانوں کی کتاب میں اپنے تاثرات درج کیے۔
وزیراعظم شہباز شریف کی مزار قائد پر حاضری
وہ اپنے دورے کے دوران کاروباری طبقے اور چیمبر آف کامرس کراچی کے نمائندوں سے ملاقات کریں گے اور ملکی معیشت کی ترقی کے حوالے سے ان سے تجاویز لیں گے۔
