اسلام آباد : وزیراعظم شہباز شریف نے چمن میں افغان بارڈر فورسز کی بلا اشتعال فائرنگ کے واقعے کو افسوناک قرار دیتے ہوئے مطالبہ کیا افغان عبوری حکومت یقینی بنائے ایسے واقعات رونما نہ ہوں۔
تفصیلات کے مطابق وزیر اعظم شہباز شریف نے سماجی رابطے کی ویب سائٹ ٹوئٹر پر اپنے بیان میں کہا کہ افغان فورسز نے بلااشتعال گولہ باری اور فائرنگ کی، جس سے متعدد پاکستانی شہید، درجن سے زائد زخمی ہوئے جو انتہائی افسوسناک ہے۔
شہباز شریف نے مطالبہ کیا کہ افغان عبوری حکومت اس بات کو یقینی بنائے کہ ایسے واقعات رونمانہ ہوں۔
Unprovoked shelling & fire by Afghan Border Forces at Chaman resulting in martyrdom of several Pakistani citizens & injuring more than a dozen is unfortunate & deserves the strongest condemnation. The Afghan Interim government should ensure that such incidents are not repeated.
— Shehbaz Sharif (@CMShehbaz) December 12, 2022
اس سے قبل پاکستان نے چمن میں شہری آبادی پرافغان فورسزکی بلا اشتعال فائرنگ کی مذمت کی، ترجمان دفتر خارجہ کا کہنا تھا کہ حملےمیں چھ پاکستانی شہری جاں بحق اورسترہ زخمی ہوئے،ایسے واقعات دونوں ممالک کے برادرانہ تعلقات کے مطابق نہیں، افغان حکام کوآگاہ کر دیا ہےکہ ایسے واقعات سے گریز کیا جائے۔
پاکستان نے مطالبہ کیا کہ حملے میں ملوث عناصرکےخلاف سخت ترین کارروائی کی جائے ،سرحدپرشہریوں کی حفاظت دونوں فریقوں کی ذمہ داری ہے، صورتحال مزیدخراب نہ ہواس لیے ایسے واقعات سے بچا جائے۔
گزشتہ روزافغان بارڈرفورسز نے چمن میں شہری آبادی پر بلااشتعال فائرنگ اورگولہ باری کی ، مارٹر گولے سمیت بھاری ہتھیاروں کا استعمال کیا، حملے میں چھ پاکستانی شہری شہید اور سترہ زخمی ہوگئے تھے۔
