اسلام آباد : وزیراعظم شہباز شریف 4 جون کو دورہ چین پر روانہ ہوں گے، دورے کے دوران سی پیک فیز ٹو اور ایم ایل ون پراجیکٹ پر معاہدوں کا امکان ہے۔
تفصیلات کے مطابق وزیراعظم شہباز شریف چار سے سات جون چین کا دورہ کریں گے، ذرائع نے بتایا کہ وزیراعظم کےہمراہ اعلیٰ سطح وفدبھی چین روانہ ہوگا۔
دورے کے دوران وزیراعظم اورچینی قیادت کی ملاقات میں سی پیک فیزٹواورایم ایل ون پراجیکٹ پر معاہدوں کا امکان ہے۔
دورے کا مقصد دونوں دوست ممالک کے درمیان تجارتی اور اسٹریٹجک تعلقات کو فروغ دینا ہے۔ توقع ہے کہ وزیراعظم چینی قیادت کے ساتھ چین پاکستان اقتصادی راہداری اور ML-1 منصوبے کے فیز II سمیت دیگر امور پر تبادلہ خیال کریں گے۔
گذشتہ روز وزیراعظم کی زیر صدارت پاکستان اور چین کے درمیان مختلف شعبوں میں تعاون بڑھانےسےمتعلق اہم جائزہ اجلاس ہوا تھا ، جس میں مختلف وفاقی وزارتوں کی جانب سے دو طرفہ معاشی تعلقات کے حوالے سے تجاویز پیش کی گئیں۔
وزیراعظم کا کہنا تھا کہ چین پاکستان کی معاشی ترقی میں اہم شراکت دار ہے،چینی انڈسٹری کو پاکستان میں صنعتیں لگانے کی دعوت دیتے ہیں۔
انھوں نے کہا تھا کہ پاکستان چین کے ساتھ ترجیحی بنیادوں پر شعبوں میں تعاون بڑھانےکاخواہاں ہے،حکومت چینی صنعت کاروں اور سرمایہ کاروں کو ہر ممکن سہولیات فراہم کرے گی۔
ان کا مزید کہنا تھا کہ سی پیک کے اگلے مرحلے کے حوالےسے بھرپور تیاری کر رہے ہیں، چینی تعاون سے گوادر بندرگاہ کو لاجسٹکس کا حب بنایا جائے گا جبکہ ایگریکلچر ڈیمانسٹریشن زونز کا قیام سی پیک کے اگلے مرحلے کے حوالے سے اہم منصوبہ ہو گا، متعلقہ وزارتیں پاکستان چین کے تعاون کے نئے منصوبوں کے حوالے سے تیاری کریں۔
