اسلام آباد : وزیراعظم شہباز شریف نے پنجاب میں پارٹی کارکنوں کو متحرک کرنے کی ہدایت کرتے ہوئے کہا کہ پی ٹی آئی کا جھوٹا بیانیہ قوم کے سامنے بے نقاب ہو چکا ، حقائق قوم کے سامنے رکھے جائیں۔
تفصیلات کے مطابق وزیراعظم شہباز شریف کی زیر صدارت سیاسی صورتحال پر پارٹی کا مشاورتی اجلاس ہوا، جس میں ملکی سیاسی صورتحال کا جائزہ لیا گیا اور پارٹی رہنماؤں نے بریفنگ دی۔
اجلاس میں پاکستان مسلم لیگ ن کی آئندہ کی سیاسی حکمت عملی، عوامی رابطہ مہم اور آئندہ عام انتخابات کی تیاریوں سے متعلق مشاورت کی گئی۔
اجلاس میں پنجاب اور وفاق میں بلدیاتی انتخابات کی تیاریوں سے متعلق امور پر بھی غور کیا گیا جبکہ اجلاس کو عوام کو ریلیف کی فراہمی کے حوالے سے امور پر بھی بریفنگ دی گئی۔
وزیراعظم نے پنجاب میں پارٹی کارکنوں کو متحرک کرنے کی ہدایت کرتے ہوئے کہا کہ پی ٹی آئی کا جھوٹا بیانیہ قوم کے سامنے بے نقاب ہو چکا ،عوام کو ریلیف فراہم کریں گے اور حقائق قوم کے سامنے رکھے جائیں۔
شہباز شریف کا کہنا تھا کہ عمران خان نے نہ صرف معیشت بلکہ سیاست اور اخلاقیات کو بھی تباہ کیا، نوجوان نسل کی بہتری کے لئے بھرپور اقدامات اٹھائے جا رہے ہیں،نوجوانوں کو اپنے مذموم مقاصد کے لئے استعمال کرنا افسوناک ہے۔