اسلام آباد : وزیراعظم شہباز شریف اضافی فنڈنگ کیلئے خود آئی ایم ایف مشن سے بات کریں گے۔
تفصیلات کے مطابق وزیراعظم شہبازشریف سے آئندہ ہفتے میں آئی ایم ایف مشن کی ملاقات کا امکان ہے ، ذرائع نے بتایا ہے کہ آئی ایم ایف مشن کی پالیسی سطح مذاکرات کے اختتام پر وزیراعظم شہباز شریف سے ملاقات ہوگی۔
ذرائع کا کہنا ہے کہ آئی ایم ایف سے اضافی فنڈنگ کیلئے وزیراعظم خود آئی ایم ایف مشن سے بات کریں گے۔
آئی ایم ایف مشن وزیراعظم سے نئے قرض پروگرام میں اہداف کی یقین دہانی پر بات کرے گا، ملاقات کے دوران وزیراعظم اور آئی ایم ایف مشن میں سخت معاشی پالیسیاں جاری رکھنے پر بات ہو گی۔
آئی ایم ایف مشن کےسیاسی جماعتوں کے رہنماؤں سے بھی ملاقات کے امکانات ہیں۔
خیال رہے پاکستان اور آئی ایم ایف کے درمیان نئے قرض پروگرام پربات چیت کا آغاز ہوگیا ہے۔
آئی ایم ایف مشن چیف نیتہن پورٹروفدکی سربراہی کریں گے، ذرائع کا کہنا ہے کہ پاکستان آئی ایم ایف سے 6 سے 8 ارب ڈالر کا قرض پروگرام لینا چاہتا ہے۔
ذرائع نے کہا ہے کہ پاکستان طویل قرض پروگرام لیناچاہتاہےجس کادورانیہ3سے4سال ہوسکتاہے اور نئے قرض پروگرام لینےکیلئےپاکستان کوسخت ترین شرائط کاسامناکرنا پڑسکتا ہے۔
ذرائع کے مطابق نئے قرض پروگرام میں بجلی سہ ماہی بنیادوں پرمہنگی کرنا پڑسکتی ہے اور گیس کے ریٹ ششماہی بنیادوں پربڑھانے پڑسکتے ہیں۔
اس کے علاوہ آئی ایم ایف نئےبجٹ میں ریلیف مزیدکم کرنےکامطالبہ کرسکتا ہے۔
