کراچی: وزیر اعلیٰ سندھ سید مراد علی شاہ نے کہا ہے کہ نشوا کے واقعے پر بہت دکھ اور تکلیف پہنچی، والدین کو یقین دلایا ہے کہ سندھ حکومت ان کے ساتھ ہے.
ان خیالات کا اظہار انھوں نے ننھی نشوا کے والد سے ملاقات کے بعد کیا. ان کا کہنا تھا کہ جوبھی ایسے اسپتال چل رہے ہیں، ان کے خلاف کارروائی ہوگی، نشوا واقعےمیں پولیس کی بے حسی، مجرمانہ غفلت پتا چلی ہے.
انتظارکررہا تھا کہ پولیس خود ہی ایکشن لے گی، لیکن ایسا نہیں ہوا، ٹکرز کی حد تک کارروائی کا نوٹس دیکھا تھا، مگر جب رپورٹ طلب کی، تو آج ملی ہے، مجھے آج معلوم ہواکہ پولیس نے ایکشن لیا ہے.
ہیلتھ کیئرکمیشن کو ذمہ داری نبھانے سے نہیں روکا، اسمبلی میں بھی کہہ دیا تھا کہ اٹھارویں ترمیم کہیں نہیں جارہی، اٹھارویں ترمیم پربحث اب ختم ہوجانی چاہیے، وفاق کسی بھی معاملےمیں مداخلت نہیں کرسکتا.
مزید پڑھیں: نشوا کی صحت بدستور خراب ہے، ایف آئی آر میں اسپتال انتظامیہ کو نامزد کیا، والد قیصر
انھوں نے کہا کہ وفاق ڈائریکشن دے سکتا ہے مداخلت نہیں کرسکتا، حکمران اپنی نااہلی چھپانے کے لئے شوشہ چھوڑ دیتے ہیں، حکومت عوام کی توجہ تبدیل کرنے کی کوشش کررہی ہے.
آرٹیکل 149 کے تحت صوبائی معاملات میں مداخلت نہیں ہو سکتی، ایسا تو2008 میں تھا، جب دہشت گردی عروج پرتھی، اب ایسا کچھ نہیں، میں آپ سےعرض کروں گا کہ مداخلت کا لفظ غلط ہے، کوئی اپنے صوبے میں کسی کومداخلت کی اجازت نہیں دیتا.
