اسلام آباد : وزیراعظم عمران خان نے وزیر اعلیٰ پنجاب کو ہنگامی طور پر اسلام آباد طلب کرلیا، وزیراعلیٰ ساہیوال واقعے پر ابتدائی جےآئی ٹی رپورٹ پر بریفنگ دیں گے اور پنجاب پولیس کےنظام میں اصلاحات سےمتعلق اہم فیصلے کئے جائیں گے۔
تفصیلات کے مطابق وزیر اعلیٰ پنجاب عثمان بزدار اسلام آباد پہنچ گئے، عثمان بزدار خصوصی طیارے کے ذریعے لاہور سے اسلام آباد پہنچے، وزیراعظم عمران خان نے وزیر اعلیٰ پنجاب کو ہنگامی طور پر اسلام آباد طلب کیا ہے۔
وزیر اعلیٰ پنجاب وزیراعظم عمران خان سے ملاقات کریں گے، ملاقات میں وزیر اعلیٰ سانحہ ساہیوال پر وزیر اعظم کو تفصیلی بریفنگ دیں گے اور واقعے کی تحقیقات میں پیش رفت سےوزیر اعظم کوآگاہ کریں گے۔
عثمان بزدار وزیراعظم کو سی ٹی ڈی کے ہٹائے گئے افسران اور اپنے دورہ ساہیوال سے متعلق بریف کریں گے جبکہ پنجاب پولیس میں اصلاحات پر بھی اپنی سفارشات پیش کریں گے۔
ذرائع کا کہنا ہے کہ ملاقات میں پنجاب پولیس کےنظام میں اصلاحات سےمتعلق اہم فیصلےکئےجائیں گے۔
یاد رہے گذشتہ روز وزیراعظم عمران خان کے زیرِ صدارت مشترکہ پارلیمانی کمیٹی کا اجلاس میں ساہیوال واقعے پرجوڈیشل کمیشن بنانے کا فیصلہ کیا گیا تھا، اجلاس میں وزیراعظم کا کہنا تھا کہ یہ واقعہ انسانی المیہ ہےاس کومثالی بنائیں گے، اپوزیشن کےمطالبے پرجوڈیشل کمیشن بنانے پرتیارہیں اپوزیشن اپنےممبرز دیناچاہتی ہےتو دے سکتی ہے۔
مزید پڑھیں : وزیراعظم نےپنجاب پولیس میں اصلاحات کیلئے سفارشات طلب کرلیں
اس سے قبل وزیر اعظم عمران خان کو سانحہ ساہیوال پر رپورٹ پیش کی گئی تھی ، جس پر وزیراعظم نےپنجاب پولیس میں اصلاحات اورمسقبل میں ایسے واقعات کی روک تھام کیلئے سفارشات طلب کرلیں تھیں۔
واضح رہے 19 جنوری کو ساہیوال کے قریب سی ٹی ڈی کے مبینہ جعلی مقابلے میں ایک بچی اور خاتون سمیت 4 افراد مارے گئے تھے، عینی شاہدین کا کہنا تھا کہ کار سواروں نے نہ گولیاں چلائیں، نہ مزاحمت کی،جبکہ سی ٹی ڈی نے متضاد بیان دیا تھا۔
