اسلام آباد : وزیراعظم شہباز شریف نے آئینی ترامیم پر اتحادی جماعتوں کے ارکان کو اعتماد میں لینے کا فیصلہ کرلیا۔
تفصیلات کے مطابق وزیراعظم شہباز شریف نے اتحادی اراکین اسمبلی کوعشائیہ پرمدعوکر لیا، عشائیہ میں سینیٹ اورقومی اسمبلی ارکان شریک ہوں گے، جس میں آئینی ترامیم پرحکومتی اراکین کو اعتماد میں لیا جائے گا۔
حکومت کی جانب سےپارلیمان میں آئینی ترمیم اتوارکوپیش کیےجانےکاامکان ہے ، حکومت اپنےممبران کی مکمل حاضری کویقینی بنارہی ہے اور وزیراعظم نےتمام اتحادی ارکان کوپیرتک اسلام آبادمیں رہنے کی ہدایت کی ہے۔
بیرون ملک جانے والوں کو بھی واپس بلالیا گیا ہے، رکن قومی اسمبلی حمزہ شہباز فرانس، عبدالغفور حیدری آج چین سے وطن واپس پہنچیں گے۔
ن لیگی رہنما ،اعجاز الحق نے بتایا کہ ترامیم اتفاق رائےسےہوں تواچھی بات ہے، اداروں میں تصادم نہیں ہوناچاہیے۔
خیال رہے آئینی ترامیم دو تہائی اکثریت منظور کرانے کے لیے اسمبلی میں دو سو چوبیس ووٹ درکار ہیں، حکومتی ارکان کی تعداد دو سوچودہ ہے۔ حکومت کومزید دس ووٹ درکار ہیں۔
سینیٹ میں دوتہائی اکثریت چونسٹھ ارکان کی بنتی ہے جبکہ حکومتی ارکان کی تعداد ساٹھ ہے تاہم حکومتی حلقوں کا دعویٰ ہے آئینی ترامیم منظور کرانے کیلئے نمبرز پورے ہیں۔
