وزیر اطلاعات پنجاب عظمیٰ بخاری نے کہا ہے کہ بلاول بھٹو نے کسانوں کے بیان پر تڑکا لگایا اور سخت تقریر کی کسانوں کے نام پر سیاست نہ کی جائے۔
اے آر وائی نیوز کے مطابق پنجاب کی وزیر اطلاعات عظمیٰ بخاری نے لاہور میں پریس کانفرنس کرتے ہوئے پی پی چیئرمین بلاول بھٹو کی کسانوں کے معاملے پر کی گئی تقریر پر ردعمل دیتے ہوئے کہا ہے کہ بلاول بھٹو نے کسانوں کے بیان پر تڑکا لگا کر سخت تقریر کی اور میری پارٹی کے بارے میں بہت تلخ جملے استعمال کیے۔ شاید ان تک کسانوں کے حوالے سے پنجاب حکومت کی پالیسی نہیں پہنچی، اس لیے کسانوں کے نام پر سیاست نہ کی جائے۔
انہوں نے کہا کہ اگر میں کوئی سوال پوچھ لوں تو ان کی توہین ہو جاتی ہے۔ آپ جلسے جلوس میں تلخ زبان استعمال کریں لیکن ہم ویسا جواب نہیں دیتے۔
عظمیٰ بخاری نے کہا کہ وزیر اعلیٰ پنجاب مریم نواز نے کسانوں کو مجموعی طور پر 109 ارب روپے کا بڑا ریلیف پیکج دیا ہے۔ ان کی ہدایت پر کاشتکاروں کو پانچ ہزار روپے فی ایکڑ ملیں گے جب کہ فلور ملز بھی 25 فیصد گندم خریدنے کی پابند ہوں گی۔
وزیر اطلاعات نے کہا کہ جنہیں پنجاب کے کسانوں کا خیال آ رہا ہے، انہوں نے خود کسانوں کے لیے کیا کیا؟ اب تک تمام صوبے خاموش تماشائی بنے بیٹھے ہیں اور کسی صوبے نے گندم کی خریداری شروع نہیں کی۔
عظمیٰ بخاری نے کہا کہ پنجاب حکومت کسانوں کی فلاح کے ساتھ صوبے میں امن وامان کے لیے اقدامات کر رہی ہے۔ ہمارے پاس پانی اور گندم کے ایشوز پر سیاست کرنے کا وقت ہی نہیں ہے۔ تاہم کسی کو بھی صوبے کے حالات خراب کرنے کی اجازت نہیں دی جائے گی۔
