پیپلز پارٹی کے سینئر رہنما خورشید شاہ نے کہا ہے کہ ن لیگ کے پاس نشستیں ہی نہیں تو وکٹری اسپیچ کیسے کی گئی۔
تفصیلات کے مطابق خورشید شاہ کا کہنا تھا کہ نواز شریف نے وکٹری اسپیچ کی ہے تو یہ بےوقوفی ہے۔ آصف زرداری کا لاہور میں ہونا یا نہ ہونا مسئلہ نہیں۔ مسئلہ نواز شریف کی تقریر ہے جو قبل از وقت ہے۔
انھوں نے کہا کہ میں نے سنا ہے کہ شہباز شریف نے آصف زرداری سے رابطہ کیا ہے۔ ہم الیکشن میں اپنا منشور لےکر آئے ہیں۔
پی پی رہنما نے کہا کہ اگر نواز شریف وزیراعظم بنتے ہیں تو کیا ہمارے منشور کو اون کریں گے؟ سیاست میں کوئی فیصلہ آخری نہیں ہوتا، کچھ بھی ہوسکتا ہے۔
خورشید شاہ نے کہا کہ ہمارے لیے اہم ہے کہ کون ہمارے منشور پر عمل کرےگا۔ سوال ہے کہ کیا نواز شریف ہمارے منشور پرعمل درآمد کریں گے۔
انھوں نے کہا کہ دیکھنا ہوگا کہ پی ٹی آئی اور آزاد امیدوار کیا فیصلہ کرتے ہیں۔ پہلے یہ دیکھنا ہوگا کہ اونٹ کس کروٹ بیٹھتا ہے، ابھی رابطہ نہیں ہوا۔ 6 پارٹیاں مل کر حکومت بنائیں گی تو پی ڈی ایم والا حال ہوگا۔
خورشید شاہ کا کہنا تھا کہ پی ٹی آئی کے فیصلے کے بعد ساری چیزیں واضح ہوجائیں گی۔ دیکھنا ہوگا پارلیمنٹ میں کس پارٹی کی کیااہمیت ہوگی۔
