اسلام آباد: پاکستان مسلم لیگ ن نے آئینی آپشنز محدود ہونے کی وجہ سے پرویز الہٰی سے استعفے کی امید باندھ لی ہے۔
ذرائع ن لیگ کے مطابق ایک لیگی رہنما نے دعویٰ کیا کہ لیگی رہنماؤں کو گزشتہ رات بتایا گیا کہ انتظار کریں ہو سکتا ہے وزیر اعلیٰ مستعفی ہو جائیں، پرویز الہٰی نے بعض شخصیات کو کہا تھا کہ وہ خود چلے جائیں گے۔
ذرائع ن لیگ کے مطابق گزشتہ رات 12 بجے وزیر اعلیٰ کو ڈی نوٹیفائی کیے جانے کا ارادہ تھا مگر انتظار کیا گیا، آج پرویز الہٰی کا استعفیٰ نہ آیا تو ڈی نوٹیفائی کے علاوہ کوئی چارہ نہیں ہوگا۔
دوسری طرف اسپیکر پنجاب اسمبلی نے صدر مملکت کو گورنر پنجاب کے خلاف لکھے گئے خط کے آئینی اور قانونی نکات پر مشاورت مکمل کر لی ہے، ذرائع اسپیکر آفس کا کہنا ہے کہ خط پر وکلا سے قانونی مشاورت کی گئی ہے، گورنر پنجاب کی جانب سے وزیر اعلیٰ کو اعتماد کے ووٹ کے کہنے کی آئینی حیثیت نہیں۔
پرویز الہٰی نے اعتماد کا ووٹ نہیں لیا اس لیے وہ آئینی وزیر اعلیٰ نہیں ہیں: رانا ثنا اللہ
ذرائع اسپیکرآفس کا کہنا ہے کہ اسپیکر کی رولنگ آئین کے آرٹیکل 209 اے کے عین مطابق ہے، مجوزہ خط میں خیال کاسترو کے حلف کو آئینی نہیں سیاسی معاملہ لکھا جائے گا، حسنین بہادر دریشک کے ساتھ معاملہ بھی آئینی نہیں سیاسی ہے، اسپیکر اسمبلی اور گورنر پنجاب دونوں عہدے آئینی عہدے ہیں۔
