کراچی : مسلم لیگ ن کی جانب سے وفاق میں ایم کیو ایم کو 3وزارتیں دیئے جانے کا امکان ہے ، جس میں پورٹ اینڈشپنگ ،اوورسیز اور سائنس اینڈ ٹیکنالوجی کی وزارتیں شامل ہیں۔
تفصیلات کے مطابق مسلم لیگ ن کی جانب سے وفاق میں ایم کیو ایم کو پہلے فیز میں 3وزارتوں کی ممکنہ آفر ہے ، ذرائع ایم کیوایم نے بتایا ہے کہ پورٹ اینڈشپنگ ،اوورسیز ،سائنس اینڈ ٹیکنالوجی کی وزارتیں دینے کا امکان ہے۔
ذرائع کا کہنا ہے کہ ایم کیو ایم آج وزارتوں اور کابینہ میں شمولیت پرمشاورت کرکے فیصلہ کرے گی۔
خیال رہے قومی متحدہ موومنٹ پاکستان نے رابطہ کمیٹی کا اہم اجلاس آج شام 4 بجے پاکستان ہاؤس طلب کر لیا ہے۔
ذرائع کا کہنا ہے کہ اجلاس میں اراکین رابطہ کمیٹی کو اس حوالے سے مسلم لیگ ن اور پیپلز پارٹی سے ہونے والے رابطوں پر بھی اعتماد میں لیا جائے گا۔
رابطہ کمیٹی اراکین کو ایم کیو ایم کی مذاکراتی کمیٹی کی جانب سے صدارتی انتخاب میں ووٹ کے لیے آصف زرداری کے رابطے اور پی پی وفد سے ملاقات میں ہونے والی گفتگو سے بھی آگاہ کیا جائے گا۔
ذرائع نے بتایا کہ رابطہ کمیٹی اجلاس میں ایم کیو ایم کے وفاقی کابینہ میں شمولیت اور وزارتوں کے معاملے پر غور بھی کیا جائے گا۔
