مسلم لیگ ن کے سینیٹر عرفان صدیقی قانونی سازی پر اپنی ہی حکومت پر برس پڑے اور کہا کہ یہ انسداد پرتشدد انتہا پسندی بل کا شکنجہ کل ہمارے گل پڑے گا۔
اے آر وائی نیوز کے مطابق مسلم لیگ ن کے سینیٹر عرفان صدیقی بھی حکومت کی جانب سے پیش کیے جانے والے انسداد پُرتشدد اور انتہا پسندی بل کی مخالفت کرنے والوں میں شامل ہوگئے وہ سینیٹ میں بل پیش کرنے اور قانونی سازی پر اپنی ہی حکومت پر برس پڑے اور اس بل کی فوری منظوری کی مخالفت کر دی۔
عرفان صدیقی نے کہا کہ آج سینیٹ میں انتہائی اہم بل پیش کیے جا رہے ہیں۔ پُر تشدد انتہا پسندی کی روک تھام بل 2023 اہمیت کا حامل ہے۔ اس بل کو پاس کرنے سے قبل کمیٹی میں پیش کرنا چاہیے تھا۔ یہ قانون منظور ہو گیا تو ایسا شکنجہ ہوگا جس میں پتا نہیں کون کون پھنسے گا، پھر کہا جائے گا کہ جب قانون بن رہا تھا تو اس وقت آپ کہاں تھے؟
’یہ بہت ہی خوفناک بل، پُر تشدد انتہا پسندی ختم نہیں بلکہ بڑھے گی‘
ن لیگی سینیٹر نے کہا کہ بل قومی اسمبلی سے نہیں براہ راست سینیٹ میں آیا ہے۔ ابھی جلد بازی میں بل پاس ہو رہا ہے۔ اس بل کا اس حالت میں پاس ہونا ایک شکنجہ ہے اور یہ شکنجہ کل کو ہمارے گلے پڑے گا۔ ہماری ذمے داری ہے اسمبلی بھیجنے کے بجائے بل کا تفصیلی جائزہ لیں۔
