لاہور : مسلم لیگ ق کے مرکزی رہنما اور سابق وزیراعلیٰ پنجاب چوہدری پرویزالہٰی نے دعویٰ کیا ہے کہ آج ہمارے پارٹی لیگل ایڈوائزر عامر سعید راں کو ایف آئی اے اہلکاروں نے اغوا کرلیا۔
اپنے ایک بیان میں ان کا کہنا ہے کہ عامرسعید راں کو میری رہائش گاہ سے واپس جاتے ہوئے اغواء کیا گیا، انہیں پکڑ کر لے جانے والی گاڑیوں سے یہ معلوم ہوا کہ ایف آئی اے اہلکاروں کے ساتھ کچھ اور لوگ بھی تھے جنہوں نے اغواء کیا۔
پرویزالٰہی کا کہنا تھا کہ اس وقعے کی صدرسپریم کورٹ بار عابد زبیری، سابق صدر طاہر نصراللہ نے مذمت کی جبکہ موجودہ ممبر بار کونسل نے بھی اس پرشدید مذمت کا اظہارکیا ہے۔
سابق وزیراعلیٰ پنجاب نے کہا کہ نگراں حکومت اور ان کے حواری ایسے ہتھکنڈوں سے باز رہیں، پتہ نہیں پنجاب کی یہ نگراں حکومت کس کے ایجنڈے پرآئی ہے؟ چن چن کر ہمارے قریبی ساتھیوں کو ٹارگٹ کر کے اٹھایا جارہا ہے۔
پرویزالٰہی نے کا کہنا تھا کہ نگراں حکومت امن وامان کو کنٹرول نہیں کرسکتی تو پھر بہتر ہے کہ گھر چلی جائے، وکلاء برادری سے اپیل ہے کہ اس صورتحال میں عامر راں کا ساتھ دیں ورنہ ایسے ہتھکنڈوں کی زد میں کوئی بھی آسکتا ہے۔
