اسلام آباد : مسلم لیگ ق کے رہنما اور وفاقی وزیر سرمایہ کاری بورڈ چوہدری سالک حسین نے ملک بھر میں عام انتخابات کے حوالے سے اہم انکشاف کیا ہے۔
اپنے ایک بیان میں ان کا کہنا ہے کہ ق لیگ کے سربراہ چوہدری شجاعت حسین نے ملک بھر میں عام انتخابات کی تجویز دے دی ہے ، چوہدری شجاعت نے وزیراعظم شہباز شریف اور آصف زرداری کو اس تجویز سے آگاہ کردیا ہے۔
چوہدری شجاعت حسین کے بیٹے سالک حسین نے بتایا کہ اس حوالے سے یہ فیصلہ کیا گیا ہے کہ ملک بھر سے مشترکہ امیدوار ہوں گے اور مسلم لیگ ق پیپلزپارٹی یا ن لیگ میں ضم نہیں ہوگی۔
قبل ازیں ذرائع سے ملنے والی اطلاعات کے مطابق دو صوبوں کے بجائے ملک بھر میں ایک ساتھ عام انتخابات کے حوالے سے پس پردہ مشاورت کا سلسلہ جاری ہے۔
یاد رہے کہ کچھ عرصہ قبل بھی یہ فارمولا خاصا زیر بحث رہا تھا کہ پی ٹی آئی اور حکمراں اتحاد بات چیت کے ذریعے عام انتخابات کی کسی ایک تاریخ پر متفق ہوجائیں۔ اس کے لئے مختلف آپشنز سوچے گئے تھے۔
ان میں سے ایک یہ بھی تھا کہ حکومت مقررہ وقت اکتوبر میں عام انتخابات کرانے کے مؤقف سے پیچھے ہٹ کر دوماہ پہلے کی تاریخ پر راضی ہوجائے، اسی طرح پی ٹی آئی بھی فوری الیکشن کے اپنے مطالبے کو ترک کرکے اس فارمولے سے اتفاق کرلے لیکن یہ تجاویز ہوا میں ہی رہیں اور فریقین اس معاملے پر ٹیبل پر نہ بیٹھ سکے۔
