لاہور: مسلم لیگ ن کے مشاورتی اجلاس کی اندرونی کہانی سامنے آگئی۔
تفصیلات کے مطابق نواز شریف کی زیر صدارت پاکستان مسلم لیگ (ن) کی اعلی قیادت کا اہم مشاورتی اجلاس پارٹی سیکرٹریٹ ماڈل ٹاؤن میں ہوا، اجلاس میں وزیر دفاع خواجہ آصف نے پارٹی کو پی ٹی آئی سے مذاکرات نہ کرنے کا مشورہ دیا ہے۔
مسلم لیگ ن کے ذرائع کے مطابق ن لیگ نے مولانا فضل الرحمان، محمود اچکزئی و دیگر سیاسی رہنماؤں سے بات چیت جاری رکھنے کا فیصلہ کیا ہے۔
ذرائع ن لیگ نے بتایا کہ اجلاس میں نیا بلدیاتی نظام لانے اور رواں سال نومبر یا دسمبر میں بلدیاتی انتخابات کرانے پراتفاق کیا گیا ہے۔
ذرائع کے مطابق نوازشریف نے وفاقی و صوبائی حکومتوں کو اپنے اخراجات کم کرنے کی ہدایت کی ہے، آئندہ چند روز میں پارٹی کی تنظیم سازی پر مبنی اجلاس بلانے کا فیصلہ بھی کیا گیا ہے، نواز شریف نے آئندہ اجلاس میں پارٹی کی تنظیم سازی پر رپورٹ پیش کرنے کی ہدایت کی۔
دوسری جانب اجلاس کے بعد میڈیا سے گفتگو کے دوران ایک سوال کے جواب میں خواجہ آصف نے واضح طور پر کہا کہ پی ٹی آئی کے ساتھ مذاکرات کا حامی نہیں ہوں۔
محمود اچکزئی کے ذریعے پی ٹی آئی سے مذاکرات سے متعلق سوال پر وزیر دفاع خواجہ آصف نے کہا کہ میں ایسی کسی ٹیم کا حصہ نہیں ہوں، میں پی ٹی آئی سے مذاکرات کے حق میں نہیں ہوں۔
