فیض آباد: مسلم لیگ ن کے کارکنان نے اے آر وائی نیوز کے عملے کو یرغمال بنا کر سچ کی آواز دبانے کی کوشش کی تو سابق وزیراعظم کی صاحبزادی مریم نواز نے کہا ہے کہ مسلم لیگ ن کے کارکنان مخالف میڈیا ہاؤسز پر حملے نہ کریں۔

تفصیلات کے مطابق نوازشریف کی ریلی جب فیض آباد کے مقام پر پہنچی تو وہاں موجود مسلم لیگ ن کے کارکنان نے اے آر وائی نیوز کے رپورٹرز کو گھیرے میں لیا اور سنگین نتائج کی دھمکیاں بھی دیں۔

مسلم لیگ ن کے کارکنان نے اے آر وائی نیوز کے اینکر عادل عباسی اور رپورٹر کو یرغمال بناتے ہوئے سچ کی آواز دبانے کی کوشش کی اور اے آر وائی نیوز کو ریلی کی کوریج سے روک دیا۔

اس خبر کی اطلاع جب مریم نواز کو ملی تو انہوں نے رسمی طور پر سماجی رابطے کی ویب سائٹ کا سہارا لیا اور کارکنان سے اپیل کی کہ وہ مخالف میڈیا ہاؤسز پر حملے نہ کریں کیونکہ اس طرح کے حملے کرنا ہماری جماعت کی روایت نہیں ہے۔

Dear PMLN supporters, pls refrain from attacking or misbehaving with anti-N media houses. It’s neither our party culture nor NS legacy. TY

— Maryam Nawaz Sharif (@MaryamNSharif) August 9, 2017

یاد رہے سپریم کورٹ کی جانب سے نااہل ہونے کے بعد نوازشریف نے آج اسلام آباد سے لاہور کا رختِ سفر باندھا اور اُن کا قافلہ فیض آباد کے مقام پر پہنچ چکا ہے، مسلم لیگ ن عوامی پاور شو کر کے یہ ثابت کرنے کی کوشش میں مصروف ہے کہ نوازشریف کی نااہلی کا فیصلہ عوام نے مسترد کردیا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔