کراچی : پاک بحریہ کے جہاز پی این ایس عالمگیر نے مختلف ممالک کے تجارتی جہازوں کو بحری قزاقوں سے سکیورٹی کی فراہم کی ہے۔
ترجمان پاک بحریہ کے مطابق پاکستان نیوی کے بحری جہاز پی این ایس عالمگیرکھلے سمندروں میں تجارتی جہازوں کو بحری قزاقوں سے سکیورٹی فراہم کرتا ہے۔
یہ غیر ملکی تجارتی جہاز بحیرِہ عرب سے گزرتے ہوئے بحیرِہ احمر میں مختلف ممالک کی بندرگاہوں کی طرف رواںِ سفر تھے۔ پی این ایس عالمگیر قُرنِ افریقہ کی بین االاقوامی تسلیم شدہ تجارتی راہداری میں موجود ہے۔
ترجمان پاک بحریہ کا کہنا ہے کہ پاک بحریہ کا جہاز قُرنِ افریقہ کے جس خطے میں رضاکارانہ سکیورٹی فراہم کر رہا ہے وہ خطہ بحری قزاقی کے خطرات سے دوچار ہے۔
پاک بحریہ کے جہاز عالمگیر کی یہ تعیناتی ریجنل میری ٹائم سکیورٹی پٹرول کے تحت عمل میں لائی گئی ہے۔ پاک بحریہ کی جانب سے ریجنل میری ٹائم سکیورٹی پٹرول کے قیام کا مقصد خطے اورعالمی پانیوں میں امن و اماں کو برقرار رکھنا ہے۔
