مظفرآباد : شاعر احمد فرہاد کی ضمانت منظور کرلی گئی ، جس کے بعد انھیں آج جوڈیشل لاک اپ سے رہا کئے جانے کا امکان ہے۔

تفصیلات کے مطابق آزاد کشمیر ہائیکورٹ میں شاعر احمد فرہاد کی درخواست ضمانت پر سماعت ہوئی۔

عدالت نے وکیل کے دلائل سننے کے بعد شاعر کی ضمانت منظور کرلی اور دو لاکھ روپے کے مچلکے جمع کرانے کا حکم دے دیا۔

جس کے بعد شاعر احمد کو آج جوڈیشل لاک اپ سے رہا کئے جانے کا امکان ہے۔

گذشتہ سماعت میں عدالت نے شاعر کو جیل منتقل کرنے کا حکم دیتے ہوئے 24 جون کو دوبارہ پیش کرنے کا حکم دیا تھا۔

مزید پڑھیں : شاعر احمد فرہاد کی گرفتاری غیر قانونی قرار

بعد ازاں اسلام آباد ہائی کورٹ نے شاعر احمد فرہاد علی شاہ کی گرفتاری غیرقانونی قرار دیتے ہوئے کہا تھا کہ مغوی شاعر کو جبری لاپتا کیا گیا اور ادارے بازیابی میں ناکام رہے۔

یاد رہے 5 جون کو انسداد دہشت گردی کی عدالت نے شاعر احمد کی درخواست ضمانت مسترد کی تھی ، جس پر اہلیہ کا کہنا تھا ہم اس فیصلے کو چیلنج کریں گے۔

واضح رہے 9 مئی کو وفاقی حکومت نے شاعر احمد کی گرفتاری ظاہر کی تھی اور اٹارنی جنرل نے عدالت کو بتایا تھا کہ وہ گرفتار اور پولیس کسٹڈی میں ہے۔

بعد ازاں پولیس نے بتایا تھا کہ شاعر احمد دفعہ اے پی سی 186کے تحت گرفتار ہوئے، ایف آئی آر میں کہا گیا ہے کہ وہ صبح7 بجے گجر کوہالہ کے مقام سے آزاد کشمیرمیں داخل ہو رہے تھے، دوران چیکنگ وہ شناختی کارڈ نہیں دکھاسکے۔

ایف آئی آر کے متن کے مطابق شاعر کارسرکار میں مداخلت کے جرم میں گرفتار ہوئے، وہ ایک اور مقدمے میں مظفرآباد پولیس کو بھی مطلوب ہیں، اس لیے ان کو مظفرآباد پولیس کے حوالے کردیا گیا تھا۔