ریاض: سعودی عرب میں اقامہ قوانین کی خلاف ورزی کرنے والے غیرملکیوں کے گرد قانون کا گھیرا تنگ ہونے لگا۔
تفصیلات کے مطابق سعودی دارالحکومت ریاض میں اہم کارروائی کی گئی اس دوران متعدد غیرملکی گرفتار ہوئے جو مملکت کے اقامہ قوانین کی خلاف ورزی کررہے تھے۔
ریاض پولیس کے ترجمان میجرخالد الکریدیس نے بتایا کہ اقامہ قوانین کی خلاف ورزی اور گاڑیاں چرا کر ان کے پرزے فروخت کرنے کے الزام میں 17 غیر ملکیوں کو گرفتار کیا گیا ہے۔
انہوں نے کہا کہ گرفتارشدگان میں 14 سوڈانی ، ایک پاکستانی اور ایک ایک افغانی و شامی باشندہ شامل ہے۔
میجر خالد کا کہنا تھا کہ گرفتار ملزمان پہلے پرانی گاڑیاں چراتے، پھر ان کے پرزے کھول کر بیچا کرتے تھے، پولیس نے ملزمان کو پناہ دینے کے الزام میں ایک سعودی شہری کو بھی پکڑا ہے۔
ترجمان نے مزید کہا کہ پولیس نے مسروقہ گاڑیاں اور پرزے اسٹور کرنے کی جگہ بھی دریافت کرلی۔
