The news is by your side.

Advertisement

ایم این اے شاہدہ رحمانی اور فریال تالپورکے نام پر پیسے بٹورنے والا ملزم گرفتار

کراچی : پولیس نے پیپلز پارٹی کی اعلی قیادت اور سیلیبریٹیز کو بڑا چونا لگانے کی کوشش کرنے والے ملزم کو گرفتار کرکے فراڈ اور ٹیلیگراف ایکٹ کے تحت مقدمہ درج کرلیا۔

تفصیلات کے مطابق کراچی میں پولیس نے پیپلزپارٹی کے ارکان اسمبلی اور سلیبریٹیز کو چونا لگانے کی کوشش ناکام بنادی ، ایم این اے شاہدہ رحمانی اور فریال تالپورکےنام پر پیسے بٹورنے والے ملزم کو گرفتار کرلیا۔

گلشن معمارتھانےکی کارروائی کےدوران ملزم کی گرفتاری عمل میں آئی ، پیپلز پارٹی وومن ونگ کراچی ڈویژن کی درخواست پر پولیس نے کارروائی کی گئی، جس کے بعد شاہدہ رحمانی کے بیٹے ہلال سعید کی مدعیت میں مقدمہ درج کرلیا گیا۔

مقدمے میں 420 اور ٹیلی گراف ایکٹ کی دفعات شامل کی گئیں، مدعی مقدمہ ہلال سعید کے مطابق ملزم ہائی پروفائل شخصیات، سیلیبریٹیز اور دیگر افراد سے شاہدہ رحمانی کے نام سے پیسے مانگتا تھا، ملزم نے شاہدہ رحمانی کے نام سے واٹس ایپ پروفائل بنائی اور واٹس ایپ میسج میں ایسے ظاہر کیا جاتا جیسے شاہدہ رحمانی فریال تالپور کے کہنے پر پیسے جمع کر رہی ہوں۔

مدعی مقدمہ کے مطابق ایک پاکستانی سنگر اور کئی شخصیات کی جانب سے پیسے بھی ایزی پیسہ کیے گئے جبکہ ملزم نے ایم این اے قادر پٹیل، پلوشہ خان، امداد پتافی ، ایم این اے ناز بلوچ ، ایم این اے آغا رفیع اللہ ایم این اے شگفتہ جمانی، ایم این اے ابرار حسین شاہ اور ایم این اے شازیہ سنگھار کو واٹس ایپ میسجز کیے اور رقم مانگی۔

مدعی ہلال سعید کے مطابق ملزم کے عمل سے میری والدہ کی ساکھ کو نقصان پہنچا ، ملزم کے خلاف قانونی کاروائی کی جائے جبکہ پولیس کی جانب سے ملزم سے مزید تفتیش کا عمل جاری ہے۔

Comments

یہ بھی پڑھیں