کراچی : بلدیہ ٹاؤن میں سی ٹی ڈی اور رینجرز نے سرچ آپریشن کے دوران مقابلے میں دو دہشت گردوں کو ہلاک کردیا۔ ہلاک شدگان کا تعلق کالعدم تنظیم سے ہے۔
تفصیلات کے مطابق کراچی کے علاقے بلدیہ ٹاؤن میں سی ٹی ڈی اور رینجرز نے دہشت گردوں کے خلاف مشترکہ کارروائی کی، ترجمان سی ٹی ڈی کے مطابق اس دوران دہشت گردوں نے بھاگنے کی کوشش میں اہلکاروں پر فائرنگ کردی۔
جس کے جواب میں اہلکاروں نے بھی فائرنگ کی، فائرنگ کے تبادلے میں دو دہشت گرد موقع پر پی مارے گئے، ہلاک دہشت گردوں کی شناخت عدنان اور رفیق کےناموں سے ہوئی ہے۔
بلدیہ ٹاؤن کے رئیس گوٹھ میں سی ٹی ڈی اور ملزمان میں ہونے والے مقابلے کے بعد دوطرفہ فائرنگ کے نتیجے میں ہلاک ہونے والوں کی لاشیں فوری طور اسپتال منتقل کردی گئیں۔
اس حوالے سے سی ٹی ڈی حکام کا کہنا ہے کہ ہلاک ہونے والے ملزمان کاتعلق کالعدم دہشت گرد تنظیم سے ہے، ہلاک ہونے والے ملزمان سے بھاری مقدار میں اسلحہ بھی برآمد ہوا ہے، ہلاک ہونے والوں میں ایک ملزم کا نام عدنان اور دوسرا رفیق کےنام سے شناخت ہوا ۔
دوسری جانب ترجمان رینجرز کا کہنا ہے کہ محمد رفیق کی گرفتاری پر حکومت سندھ نے20 لاکھ روپے انعام مقرر کر رکھا تھا، عدنان شبیر کالعدم تنظیم کا انتہائی خطرناک دہشت گرد تھا، ہلاک ہونے والے دہشت گرد بم دھماکوں، بینک ڈکیتی، فرقہ وارانہ دہشت گردی کی متعدد وارداتوں میں ملوث تھے۔
ترجمان رینجرز کے مطابق یہ دہشت گرد قانون نافذ کرنے والے اہلکاروں کی ٹارگٹ کلنگ میں بھی ملوث تھے، ہلاک دہشت گردوں کا تعلق کالعدم ٹی ٹی پی استاد اسلم گروپ سے تھا، کارروائی گزشتہ رات یار محمد گوٹھ بلدیہ ٹاؤن میں خفیہ اطلاع پرکی گئی۔
رینجرز کا کہنا ہے کہ مقابلے کے دوران ملزمان نے وارننگ کےباوجود فائرنگ جاری رکھی، فورسز کی جوابی فائرنگ میں دونوں دہشت گرد مارے گئے، ہلاک دہشت گردوں سے2ایس ایم جی،2پستول، ایمونیشن اوربارود مواد برآمد ہوئے ہیں۔
