کراچی : نیو گولی مار چورنگی پر صبح ہونے والا پولیس مقابلہ مشکوک ہوگیا، پولیس نے دعوی کیا کہ ملزمان سے فائرنگ کے تبادلے میں ایک نوجوان زخمی ہوا۔
تفصیلات کے مطابق کراچی میں ایک اور پولیس مقابلہ مشکوک ہوگیا، نیوگولیمار چورنگی کے قریب فائرنگ کا واقعہ پیش آیا۔
پولیس نے دعویٰ کیا ہے کہ انڈر پاس میں دو موٹر سائیکلوں پر سوار چار ملزمان لوٹ مار کررہے تھے کہ پولیس پارٹی موقع پرپہنچی تو ملزمان سے فائرنگ کا تبادلہ ہوا۔
پولیس کا کہنا تھا کہ فائرنگ کے تبادلے ایک ملزم زخمی ہوا جسے اس کے ساتھی اپنے ساتھ لےکر فرار ہوگئے، مقابلے کے بعد انڈرپاس میں ایک نوجوان زخمی ملا، جسے اسپتال منتقل کردیاگیا، زخمی ایان کو کمر میں گولی لگی ہے۔
پولیس نے مزید بتایا کہ زخمی فائرنگ کے تبادلے میں زد میں آیا یا کوئی اورواقعہ ہوا ، اس حوالے سے تحقیقات جاری ہیں۔
دوسری جانب پولیس کے دعویٰ کے برعکس زخمی ایان کے ساتھی کا کچھ اور ہی کہنا تھا، اویس کے مطابق سادہ لباس اہلکاروں نے روکا ، ساتھی نے بائیک گھمائی تو فائرنگ کردی۔
زخمی ایان کے لواحقین کا اسٹیڈیم روڈپر پولیس کیخلاف احتجاج جاری ہے ، احتجاج ایس ایچ رضویہ اور ان کی سادہ لباس پولیس پارٹی کیخلاف کیا جا رہا ہے۔
پندرہ سالہ آیان کے اہل خانہ کا کہنا ہے کہ دونوں دوست سحری کا سامان لینے گھر سے نکلے تھے، ملوث اہلکاروں کیخلاف کارروائی کی جائے۔
اہل خانے نے مزید کہا کہ گولی لگنے کے باعث ایان کا نچلا دھر مفلوج ہوگیا ہے، واقعہ کا مقدمہ اب تک درج نہیں کیا گیا، مطالبہ ہے کہ ایس ایچ اورضویہ اورپولیس پارٹی پرمقدمہ درج کیا جائے، جب تک ہمارے ساتھ انصاف نہیں ہوگا،احتجاج جاری رکھیں گے۔
