نارتھ کراچی سیکٹر الیون بی میں پولیس مقابلے کے دوران 5 ڈاکوؤں کو ہلاک کردیا گیا، جبکہ 2ڈاکو فرار ہونے میں کامیاب ہوگئے۔
اے آر وائی نیوز کے مطابق اہلخانہ نے بتایا کہ ملزمان گھرمیں داخل ہوئے تو اُس وقت تمام گھر والے سو رہے تھے، ملزمان نے بھائی پر تشدد کیا،میرے ہاتھ باندھ دیئے۔
اہلخانہ کا کہنا تھا کہ ڈاکو دیوار پھلانگ کر گھر میں داخل ہوئے، کمرے کی کھڑکی کا شیشہ توڑا، ڈاکوؤں نے کمرے میں داخل ہوتے ہی گھر والوں کویرغمال بنایا۔
ڈاکو پہلے گراؤنڈ فلور کے کمرے میں الماریوں سے سامان نکالتے رہے اور تمام کمروں کی تلاشی لی، زیورات، لیپ ٹاپ، موبائل فون اُٹھالئے۔
پڑوسیوں نے 15پر اطلاع دی تو پولیس موقع پر پہنچ گئی، اس دوران مقابلہ ہوا جس میں 5ڈاکو ہلاک کردیئے گئے، جبکہ 2ساتھی فرار ہوگئے۔
دوسری جانب سائٹ سپر ہائی وے دلدارعمرانی گوٹھ میں مقابلے میں 4زخمیوں سمیت7ملزمان کوحراست میں لے لیا گیا۔
پولیس کا کہنا ہے کہ گرفتار تمام ملزمان کی شناخت ہوگئی، ملزمان کا تعلق موٹرسائیکل لفٹر گروہ سے ہے، مقابلے میں بلال،طارق، ممتاز اورخالد زخمی ہوئے، آصف، رزاق اورعامر کو فرار ہوتے ہوئے گرفتار کیاگیا۔
ملزمان کی نشاندہی پرچھپائی گئی 12موٹرسائیکلیں برآمد کرلی گئیں، گرفتار ملزمان کا تعلق جنوبی پنجاب کے مختلف اضلاع سے ہے، ملزمان نے موٹرسائیکلیں لفٹنگ کیلئے گروہ بنا رکھا تھا۔
چوری شدہ موٹر سائیکلیں سندھ اور بلوچستان میں فروخت کی جاتی ہیں، جبکہ گرفتار ملزمان سے مزید تفتیش کا عمل جاری ہے۔
