میری لینڈ : امریکہ میں ایک گھر سے لاش اور124خطرناک سانپ کے برآمد ہونے کے بعد خوف وہراس پھیل گیا، گھر کے مالک نے غیر قانونی طور پر سانپ پال رکھے تھے۔
تفصیلات کے مطابق امریکی ریاست میری لینڈ کی چارلس کاؤنٹی میں ایک شخص کی لاش اس کے گھر سے ملی، پولیس کے مطابق اسے اس گھر سے تقریباً 124 سانپ بھی ملے ہیں۔
غیر ملکی خبر رساں ادارے کی رپورٹ کے مطابق مقامی پولیس کا کہنا ہے کہ ان سانپوں میں سے بعض کو زہریلے سانپ کے طور پر شناخت کیا گیا، ان میں مختلف اقسام کے سانپ بشمول اژدھے، پھنکارنے والے سانپ، کوبرا اور بلیک ممبا شامل ہیں۔
چارلس کاؤنٹی کے شیرف آفس کے مطابق ان سانپوں کو ایک ٹینک نما پنجرے میں رکھا گیا تھا۔ یہ صورتحال اس وقت سامنے آئی جب مذکورہ بالا49 سالہ مردہ شخص کافی دن نظر نہ آیا تو اس کے پڑوسی نے گھر میں جھانکا اور اسے زمین پر پڑے دیکھ کر پولیس کو اطلاع دی۔
پولیس نے جائے وقوعہ پر پہنچ کر صورتحال کا جائزہ لیا، پولیس کا کہنا ہے بظاہر کوئی گڑبڑ تو نظر نہیں آئی تاہم اس حوالے سے تفتیش جاری ہے۔
