کراچی : سی ویو دو دریا پر سمندر میں چھلانگ لگاکر خودکشی کرنے والی لڑکی کا موبائل مل گیا ، جس کی مدد سے مزید تحقیقات جاری ہیں۔
تفصیلات کے مطابق کراچی سی ویو دو دریا کے قریب ڈوبنے والی لڑکی کی تلاش کے لئے دوسرے روز بھی ریسکیو آپریشن جاری ہے۔
پولیس کا کہنا ہے کہ واقعاتی شواہد کے مطابق لڑکی نے خودکشی کی ہے ، لڑکی کا بیگ ملا ہے، جس میں لڑکی کا موبائل فون موجود تھا، جس کی مدد سے مزید تحقیقات جاری ہیں۔
یاد رہے گذشتہ روز کراچی میں سی ویو پر دو دریا پر نوجوان لیڈی ڈاکٹر نے سمندر میں چھلانگ لگا دی تھی، لڑکی کا شناخت سارہ ملک دختر ابرار احمد کے نام سے ہوئی تھی۔
تاہم لڑکی نے سمندر میں چھلانگ کیوں لگائی اسکی وجہ سامنے نہ آسکی، لڑکی اعظم بستی محمود آباد کی رہائشی تھی۔
لڑکی کے والد ابرار احمد ریٹائرڈ پولیس ہیڈ کانسٹیبل ہے ، والد نے پولیس کو بیان دیتے ہوئے بتایا کہ میری بیٹی ہاوس جاب مکمل کرچکی تھی ، بیٹی نے ایسا کیوں کیا معلوم نہیں۔
