پولیس کا پرویزالٰہی کی رہائش گاہ پر چھاپہ ، سیڑھی لگا کر گھر میں داخل

گجرات : پنجاب پولیس نے مسلم لیگ ق کے رہنما اور سابق وزیراعلیٰ چوہدری پرویزالٰہی کی رہائشگاہ پر چھاپہ مارا اور سیڑھی لگا کر گھر میں داخل ہوگئی۔

تفصیلات کے مطابق گجرات میں سابق وزیراعلیٰ چوہدری پرویزالٰہی کی رہائشگاہ کنجاہ ہاؤس پرپولیس نے رات گئے چھاپہ مارا۔

پولیس کی بھاری نفری نے رات بھر پرویزالٰہی رہائش گاہ کو گھیرے میں لیے رکھا اور باہر پولیس کی متعدد گاڑیاں موجود رہیں۔

صبح سویرے پولیس اہلکار سیڑھی لگا کر گھر میں داخل ہوگئے، پولیس گھر کے ملازمین سے پوچھ گچھ کے بعد روانہ ہوگئی۔

ملازمین کنجاہ ہاؤس نے بتایا کہ پرویزالہٰی کی رہائشگاہ پر خاندان کا کوئی فرد موجود نہیں تھا۔

دوسری جانب گجرات پولیس نے کنجاہ ہاؤس پر چھاپے سے متعلق اظہار لاعلمی کیا ، چھاپے کی ویڈیو بھی سامنے آگئی ہے ، جس میں کنجاہ ہاؤس کے باہرپولیس کی متعدد گاڑیاں دیکھی جاسکتی ہیں۔

Comments