رائیونڈ: ریلوے پولیس سے ملزم کو لگائی گئی ہتھکڑی کی چابی گم ہو گئی، ہتھکڑی کھلوانے کے لیے لاک ماسٹر کے پاس لے جانا پڑا۔
تفصیلات کے مطابق کراچی سے لاہور جانے والی عوام ایکسپریس جب ساہیوال ریلوے اسٹیشن پہنچی تو ٹرین میں موجود مسافر جبرائیل اور محمد عرفان کے مابین سیٹ پر بیٹھنے پر جھگڑا ہوگیا جس پر ٹرین گشت پر مامور لاہور ریلوے پولیس نے جبرائیل نامی مسافر کو ہتھکڑی لگا دی۔
پولیس کے مطابق جبرائیل کا تعلق کرم ایجنسی جب کہ محمد عرفان کا بہاول پور سے تعلق ہے۔
رائیونڈ پہنچنے پر فریقین میں صلح ہوئی تو ریلوے پولیس کے اہل کار نے ملزم کی ہتھکڑی کھولنے کے لیے جیب سے چابی نکالنی چاہی تو معلوم ہوا کہ چابی کھو چکی ہے۔
یہ بھی پڑھیں: جرائم میں ملوث تین ملزمان گرفتار، اسحلہ اور مسروقہ سامان برآمد
بعد ازاں ملزم کو رائے ونڈ کے مختلف تھانوں میں لے جایا گیا مگر ہتھکڑ ی نہ کھل سکی جس پر ریلوے پولیس اہل کار مسافر کو مین بازار میں موجود لاک ماسٹر کے پاس لے گئے جہاں ملزم کو ہتھکڑی کاٹ کر رہائی نصیب ہوئی۔
ریلوے پولیس افسر نے نام ظاہر نہ کرنے کی شرط پر بتایا کہ ٹرین گشت پارٹی کے پاس موجود ہتھکڑی سرکاری نہیں ہے، سرکاری ہتھکڑی مضبوط اور دیسی ساخت کی ہوتی ہے جب کہ ٹرین گشت پارٹی کے پاس چائنا ساخت کی ہتھکڑی تھی جس کی چابی کسی بھی تھانے کے پاس نہیں ہوتی۔
