کراچی: پولیس کی وردی میں ملبوس ہوکر راہ چلتی خواتین کے پرس چھیننے والا ملزم گرفتار ہوگیا، ملزم نے گزشتہ روز بھی واردات کی تھی۔
تفصیلات کے مطابق تیموریہ پولیس نے خواتین کے پرس چھیننے والے ملزم کو پکڑلیا، پولیس کا کہنا ہے کہ ملزم پولیس کی وردی پہن کر یہ وارداتیں کرتا تھا، اس نے گزشتہ روز بفرزون کے علاقے میں بھی خاتون سے پرس چھینا تھا۔
گرفتارملزم کی شناخت نادرعلی ولد قادر بخش کے نام سے ہوئی ہے، ملزم سے چھینا ہوا پرس، پولیس وردی اور پولیس نمبر پلیٹ والی موٹرسائیکل برآمد کرلی گئی ہے۔
خیال رہے کہ ملزمان کی جانب سے کراچی میں پرس چھیننے کی کئی وارداتیں سامنے آئی ہیں، کچھ عرصہ قبل بھی ڈیفنس میں موٹر سائیکل سوار ملزمان نے راہ چلتی خاتون پرس چھینتے ہوئے گرادیا اور فرار ہوگئے تھے۔
اس واقعے کی ویڈیو بھی سامنے آئی تھی، خاتون سڑک پر چل رہی تھیں اس دوران موٹر سائیکل سوار ملزمان تیزی سے آئے اور پرس چھیننے کی کوشش کی لیکن ناکامی پر انہیں گرا کر رفو چکر ہوگئے۔
واضح رہے کہ کراچی میں اسٹریٹ کرائم کی وارداتوں میں روز بروز اضافہ ہوتا جارہا ہے لیکن اکثر کیسز میں پولیس ملزمان کو گرفتار کرنے میں ناکام نظر آتی ہے۔
