کراچی: 3 فروری کو سندھ میں شروع ہونے والی انسداد پولیو مہم میں غیر حاضری اور لاپرواہی برتنے پر محکمہ بلدیات سندھ نے 12 میونسپل کمشنرز کو شوکاز نوٹس جاری کر دیے۔
تفصیلات کے مطابق محکمہ بلدیات نے انسداد پولیو مہم کے دوران کوتاہی برتنے والے میونسپل کمشنرز کے خلاف سخت کارروائی کرتے ہوئے انھیں شوکاز نوٹس جاری کیے ہیں۔
جن میونسپل کمشنرز کو شوکاز نوٹس جاری ہوئے ہیں، ان میں ٹاؤن میونسپل کمشنر گڈاپ احمد یار کیریو، ٹاؤن میونسپل کمشنر ناظم آباد اطہر حسین، ٹاؤن میونسپل کمشنر لیاقت آباد دریا خان پتافی، ٹاؤن میونسپل کمشنر جناح ٹاؤن الہٰی بخش بھانبھن، چنیسر ٹاؤن میونسپل کمشنر اقرار احمد جلبانی شامل ہیں۔
پولیو کے قطرے پلانے سے انکار پر 5 والدین گرفتار
ٹاؤن میونسپل کمشنر گلشن اقبال جاويد رحمٰن، صفورا ٹاؤن میونسپل کمشنر امتیاز علی منگی، میونسپل کمشنر سہراب گوٹھ تنوير احمد، بلدیہ ٹاؤن میونسپل کمشنر امجد علی پتافی، میونسپل کمشنر ماڑی پور محمد جاوید قمر، مورڑومیر بحر ٹاؤن میونسپل کمشنر شہید اللہ بخش، اورنگی ٹاؤن میونسپل کمشنر آغا فہد احمد کو بھی شوکاز نوٹس جاری کیا گیا ہے۔
تمام میونسپل کمشنرز کو متعلقہ اسسٹنٹ کمشنرز کو رپورٹ کرنے کا حکم دیا گیا ہے، میونسپل کمشنرز سے کہا گیا ہے کہ وہ غفلت پر اپنا مؤقف پیش کریں اور پولیو مہم میں عملے کی حاضری یقینی بنائیں۔
