پشاور: صوبہ خیبر پختونخواہ کے شہر ہنگو سے لیے گئے ماحولیاتی نمونے میں پولیو وائرس کی تصدیق ہوگئی، وائرس جینیاتی طور پر افغان صوبے ننگر ہار میں موجود وائرس سے منسلک ہے۔
تفصیلات کے مطابق وزیر صحت عبدالقادر پٹیل کا کہنا ہے کہ صوبہ خیبر پختونخواہ کے شہر ہنگو کے ماحولیاتی نمونے میں پولیو وائرس کی تصدیق ہوگئی ہے۔
وزیر صحت کی جانب سے کہا گیا ہے کہ والدین پختونخواہ میں جاری انسداد پولیو مہم میں بچوں کو ویکسین لازمی پلائیں۔
انہوں نے کہا کہ اس سے قبل اپریل میں اسی مقام سے لیے گئے ماحولیاتی نمونے میں بھی وائرس تھا، وائرس جینیاتی طور پر افغان صوبے ننگر ہار میں موجود وائرس سے منسلک ہے۔
وزیر صحت کا کہنا تھا کہ پولیو وائرس کی ماحول میں موجودگی بچوں کی صحت کے لیے بڑا خطرہ ہے، صرف ویکسین ہی بچوں کو عمر بھر کا تحفظ فراہم کرتی ہے۔
انہوں نے مزید کہا کہ حکومت نے پولیو کے خاتمے کے لیے مربوط حکمت عملی کو یقینی بنایا ہے، پولیو کا خاتمہ ہمارا مذہبی اور اخلاقی فرض ہے۔
خیال رہے کہ سال 2023 میں اب تک پولیو کا ایک کیس رپورٹ کیا جاچکا ہے جو صوبہ پختونخواہ سے رپورٹ ہوا ہے۔
گزشتہ برس بھی پختونخواہ سے سال بھر کے دوران 20 پولیو کیسز رپورٹ ہوئے تھے۔
