اسلام آباد: وزیر اعظم کے معاونِ خصوصی برائے صحت ڈاکٹر ظفر مرزا نے کہا ہے کہ انسداد پولیو مہم کے دوران ملک بھر کے 99 فیصد بچوں کو قطرے پلانے کا ہدف حاصل کر لیا۔
انسداد پولیو مہم کے خاتمے پر معاون خصوصی برائے صحت ڈاکٹر ظفرمرزا نے بیان دیتے ہوئے کہا کہ حالیہ مہم میں 99 فیصدبچوں کوقطرےپلانے کا ہدف حاصل کیاگیا، مہم میں مجموعی طور پر 2 لاکھ 65 ہزار پولیو ورکرز نےحصہ لیا۔
اُن کا کہنا تھا کہ رواں سال اب تک 111 پولیوکیس رپورٹ ہوئے جس کے بعد مہم کی اہمیت بڑھ گئی تھی، بلوچستان اور خیبرپختونخواہ کے اضلاع سے ابھی اعداد و شمار آنا باقی ہیں مگر ابھی تک سامنے آنے والے اعدادوشمار کےمطابق 39.1 ملین(99 فیصد) بچوں کو حفاظتی قطرےپلائےگئے۔
ڈاکٹر ظفر مرزا کا کہنا تھا کہ کراچی،کوئٹہ،خیبر، پشین اور قلعہ عبداللہ میں پولیو مہم کل تک جاری ہے، حالیہ مہم کا آغاز وزیر اعظم نے بچوں کو انسداد پولیو کے قطرے پلا کر کیا تھا۔
معاون خصوصی کا کہنا تھا کہ وزیراعظم کا اقدام پولیو کےخلاف قومی یکجہتی کی بڑی علامت ہے، تمام وزرائےاعلیٰ اور سیاسی جماعتوں نےمہم کی کامیابی میں اپنا اپنا کردار ادا کیا۔
انہوں نے اپیل کی کہ موذی مرض کےخاتمے کے لیےتمام مکتبہ فکر اپنا کردار ادا کریں، عالمی برداری کے تعاون کے باوجود ہمیں پولیو وائرس کے خاتمے میں مشکلات کاسامنا ہے مگر ہم مشترکہ کوششوں سے پاکستان کو جلد پولیو فری ملک بنا ئیں گے۔
