سجاول : سرکاری اسپتال میں لیڈی ڈاکٹر کی غیرحاضری کے باعث ڈیلیوری کیلئے اسپتال آنے والی حاملہ خاتون نے درگاہ کے احاطے میں بچے کو جنم دے دیا۔
تفصیلات کے مطابق سندھ بھر میں سرکاری اسپتالوں کی حالت زار اب بھی نہ بدل سکی، حاملہ خاتون ڈیلیوری کےلیے میرپور بٹھورو کے سرکار تعلقہ اسپتال پہنچی تھی تو لیڈی ڈاکٹر ڈیوٹی پر حاضر ہی نہیں تھی، جس کے بعد خاتون نے اسپتال کے قریب واقع درگاہ کے احاطے میں ہی بچے کو جنم دے دیا۔
ذرائع کا کہنا ہے کہ واقعے کی اطلاع ملنے پر سندھ پیپلز ایمبولینس موقع پر پہنچی اور ماں اور بچے کو ابتدائی طبی امداد فراہم کی تھی۔
اہل خانہ نے الزام عائد کیا ہے کہ ڈلیوری کےلیے سرکاری اسپتال گئے وہاں لیڈی ڈاکٹر موجود نہ تھی جس کے باعث ہمیں مجبوراً پرائیویٹ کلینک جانا پڑا جہاں لیڈی ڈاکٹر نے پیسے لانے کیلئے کہا۔
اہل خانہ نے بتایا کہ ہم پیسے لینے کےلیے گئے لیکن واپس آنے میں تھوڑی دیر ہوگئی جس کے باعث لیڈی ڈاکٹر مریضہ کو کلینک سے باہر نکال کر چلی گئی۔
اہلخانہ کا کہنا تھا کہ کلینک سے نکالے جانے کے بعد حاملہ خاتون نے کلینک کے قریب درگاہ میں تشویشناک حالت میں بچے کو جنم دیا۔