ویٹی کن سٹی : پوپ فرانسس نے کرسمس کے موقع پر کہا کہ امیر اور غریب کے درمیان فرق قابل مذمت ہے لوگ مادہ پرستی چھوڑ کر ایک سادہ زندگی گزاریں۔
تفصیلات کے مطابق پاکستان سمیت دنیا بھر میں مسیحی برادری آج حضرت عیسیٰ علیہ اسلام کے یوم ولادت کے سلسلے میں کرسمس کا تہوار مذہبی جوش و جذبے سے منارہی ہے، جس کی مرکزی تقریب کا انعقاد ویٹی کن سٹی میں ہے۔
عیسائیوں کے مذہبی پیشوا پوپ فرانسس نے مسیحی برادری کے مرکز ویٹی کن سٹی میں منعقدہ مرکزی تقریب سے خطاب کرتے ہوئے کہا کہ دنیا میں بڑھتی ہوئی مادہ پرستی اور غربت کی مذمت کرتا ہوں۔
پوپ فرانسس کا کہنا تھا کہ امیر اور غریب کے درمیان بڑھتا فرق قابل مذمت ہے لوگ مادہ پرستی چھوڑ کر غریبوں کی مدد کریں۔
پوپ فرانسس نے ترقی پذیر ممالک میں بسنے والے لوگوں کو ایک سادہ زندگی گزارنے کی ہدایات کیں۔
کرسمس موقع پر پاکستان کے دارالحکومت اسلام آباد، لاہور، کراچی سمیت ملک کے دیگر شہروں میں کرسمس کے موقع پر تقریبات منعقد کی گئیں جس میں ملکی ترقی اورخوشحالی کے لیے دعائیں مانگی گئیں۔
کرسمس کے تہوار پر گرجا گھروں کو برقی قمقموں،اورپھولوں کے ساتھ نہایت خوبصورتی سے سجایا گیا ہے جبکہ مرد وخواتین اور بچوں نے مذہبی تہوار کے حوالے سے خریداری بھی کی۔
مزید پڑھیں : مسیحی برادری آج کرسمس کا تہوارمذہبی جوش وجذبے سے منا رہی ہے، ملکی ترقی کیلیے دعائیں
واضح رہے کہ مسیحی برادری حضرت عیسٰی علیہ السلام کی ولادت کی خوشی میں ہرسال 25دسمبر کو کرسمس کا تہوار مناتی ہے جس میں عیسائی برادری کی جانب سے گرجا گھروں اور رہائشی عمارتوں کو برقی قمقموں اور پھولوں کے ساتھ نہایت خوبصورتی سے سجایا جاتا ہے۔
