کیتھولک عیسائیوں کے مذہبی پیشوا پوپ فرانسس کی طبیعت میں معمولی بہتری کی اطلاعات سامنے آرہی ہیں۔
غیر ملکی ذرائع ابلاغ کے مطابق ویٹی کن کا اس حوالے سے کہنا ہے کہ ڈبل نمونیا میں مبتلا پوپ فرانسس کو سانس کی آمد و رفت مستحکم ہونے پر وینٹی لیٹر سے ہٹا دیا گیا۔ تاہم پوپ کی حالت ابھی خطرے سے باہر نہیں ہے۔
ویٹی کن کے مطابق گزشتہ رات سانس لینے میں دشواری کے سبب پوپ کو دوبارہ وینٹی لیٹر پر منتقل کردیا گیا تھا۔
واضح رہے کہ نمونیا میں مبتلا 88 سالہ پوپ 14 فروری سے اٹلی کے اسپتال میں زیر علاج ہیں جہاں ان کی طبیعت میں واضح طور پر بہتری نہیں آسکی ہے۔
دنیا بھر میں مسیحی برادری کی جانب سے اپنے پوپ کی مکمل صحت یابی کے لیے مسلسل دعائیں مانگی جارہی ہیں اور گرجا گھروں میں خصوصی عبادات کا بھی اہتمام کیا جا رہا ہے۔
یاد رہے کہ اتوار کو وینٹی لیٹر سے ہٹائے جانے کے بعد پیر کو انہیں دوبارہ مکینیکل وینٹی لیشن پر ڈال دیا گیا تھا۔ انہیں جمعہ کے روز سانس لینے میں مدد دینے والی مشین سے منسلک گیا تھا، پوپ کو ٹیوب کے ذریعے وینٹی لیٹر پر نہیں ڈالا گیا بلکہ وہ مستقل ماسک استعمال کر رہے ہیں۔
