سعودی عرب کے شہر مدینہ منورہ میں ایک روایتی مشروب رمضان المبارک میں مقامی افراد کے ساتھ ساتھ عمرہ زائرین کی توجہ بھی کھینچ لیتا ہے۔
اردو نیوز کے مطابق دنیا کے دیگر ممالک کی طرح سعودی عرب میں بھی رمضان کے حوالے سے کئی مشروب عوام میں مقبول ہیں، مدینہ منورہ کے باشندے 70 برس سے الخشہ سوبیا بڑی پابندی سے استعمال کر رہے ہیں۔
مدینہ منورہ میں الخشہ خاندان سوبیا مشروب کے حوالے سے مشہور ہے، یہ خاندان 70 برس سے سوبیا فروخت کرتا رہا ہے۔ اب سوبیا الخشہ کے نام سے کاروباری ٹریڈ مارک رجسٹر کروالیا گیا ہے۔
سوبیا الخشہ بنانے کے ماہر چاچا سعود الخشہ کا کہنا ہے کہ ہمارے خاندان میں سوبیا کی تیاری آباؤ اجداد سے ورثے میں ملی ہے، میں خود بھی 70 سال سے اس پیشے سے منسلک ہوں۔ شروع میں سوبیا تھیلیوں میں فروخت ہوتا تھا اور اب پلاسٹک کے کین میں فروخت کیا جاتا ہے۔
انہوں نے کہا کہ سوبیا مشروب رمضان کے دوران مدینہ منورہ کے زائرین میں بہت زیادہ مقبول ہوچکا ہے۔
یہ مشروب قدرتی عناصر سے بھرپور ہے جو دارچینی، پسی ہوئی الائچی اور جو سے تیار ہوتا ہے۔ اسے اہل مدینہ کا محبوب ترین اور سحر آفریں مشروب مانا جاتا ہے۔
