لاہور : دریائے سندھ میں اونچے درجے کے سیلابی ریلے کے پیش نظر نشیبی علاقوں میں اضافی نفری تعینات کر دی گئی ہے۔
تفصیلات کے مطابق دریائے سندھ میں اونچے درجے کے سیلابی ریلے کا امکان ہے ، سیلابی ریلے کے پیش نظر آئی جی پنجاب فیصل شاہکار کی ہدایت پرنشیبی علاقوں میں اضافی نفری تعینات کردی گئی ہے۔
ایڈیشنل آئی جی ساؤتھ پنجاب کی جانب سے سیلابی صورتحال اور امدادی کارروائیوں کی مسلسل مانیٹرنگ جاری ہے۔
آر پی او ڈی جی خان کی ہدایات پر دریائے سندھ سے ملحقہ علاقوں میں پولیس ٹیمیں متحرک ہیں اور پولیس کے جوان سیلاب زدہ علاقوں میں دن رات متاثرین کی مدد کرنے میں مصروف ہیں۔
پنجاب پولیس کا کہنا ہے کہ ڈی جی خان ریجن میں 1731 جوان امدادی سرگرمیوں میں مصروف ہیں ، ڈی جی خان ریجن میں 14 ہزار سے زائد افراد کو محفوظ مقامات پر منتقل کیا جا چکا ہے۔
ترجمان کے مطابق سیلاب زدہ علاقوں سے6 ہزار سے زائد مویشیوں کو ریسکیو کیا گیا اور سیلاب زدگان میں 17 ہزار سے زائد امدادی سامان کے پیکٹ تقسیم کیے گئے۔
ڈی جی خان ریجن میں پولیس کی جانب سے 27 امدادی کیمپ بھی قائم کئے گئے ہیں۔
