اسلام آباد : پاکستان امریکا تعلقات کے 75سال مکمل ہونے پر یادگاری ڈاک ٹکٹ کا اجرا کردیا گیا، امریکی سفیرڈونلڈ بلوم نے کہا کہ یہ ڈاک ٹکٹ دونوں ملکوں کی آزادی کی علامتوں کونمایاں کرتا ہے۔
تفصیلات کے مطابق پاکستان امریکا تعلقات کے 75سال مکمل ہونے پر یادگاری ڈاک ٹکٹ کا اجرا کیا گیا، اس حوالے سے تقریب امریکی سفیرکی رہائش گاہ پرمنعقد ہوئی۔
جس میں مہمان خصوصی سیکرٹری خارجہ اسدمجیدخان،سول سوسائٹی اراکین نے شرکت کی، اس موقع پرامریکی سفیرڈونلڈ بلوم نے کہا کہ یہ ڈاک ٹکٹ دونوں ملکوں کی آزادی کی علامتوں کونمایاں کرتا ہے اور دوستی کے 75سال کا نشان ہے۔
امریکی سفیر کا کہنا تھا کہ یہ ہماری مستقبل کی شراکت داری کےایک وژن کو ظاہر کرتا ہے، جب ہم مل کر کام کرتے ہیں تو ہم عظیم کام انجام دے سکتے ہیں۔
سیکرٹری خارجہ اسدمجید نے کہا کہ پاکستان امریکا کے ساتھ دیرینہ تعلقات کو قدر کی نگاہ سے دیکھتا ہے، امریکا 7 دہائیوں سے ہمارا کلیدی اقتصادی اور ترقیاتی شراکت دار رہا ہے۔
