اسلام آباد: بجلی کمپنیاں صوبائی حکومتوں کے سپرد کرنے کے لیے بڑا قدم اٹھاتے ہوئے وزیر اعظم نے کمیٹی تشکیل دے دی۔
تفصیلات کے مطابق وفاقی حکومت بجلی کمپنیوں میں نقصانات کم کرنے اور وصولیاں بڑھانے میں ناکام رہی ہے، جس پر بجلی کمپنیاں صوبائی حکومتوں کے سپرد کرنے کے حوالے سے وزیر اعظم شہباز شریف نے 13 رکنی کمیٹی تشکیل دے دی۔
وزیر دفاع خواجہ آصف کی سربراہی میں کمیٹی قائم کی گئی ہے، وزیر بجلی، وزیر تجارت، وزیر مملکت پیٹرولیم، وزرائے اعلیٰ، سیکریٹری مشترکہ مفادات کونسل، سیکریٹری پاور، پیٹرولیم، نجکاری کمیٹی میں شامل ہیں۔
کمیٹی کے لیے ٹی او آر بھی طے کر دیے گئے، یہ کمیٹی اس بات کا جائزہ لے گی کہ صوبوں کو منتقلی کے بعد بجلی کمپنیوں کے لیے اسٹریٹجک روڈمیپ کیا ہوگا اور بجلی کمپنیوں کے حوالے سے صوبائی حکومتوں کی ذمہ داریاں کیا ہوں گی؟
یہ کمیٹی کمپنیوں کی منتقلی کے معاملے پر وفاق اور صوبوِں کے درمیان فریم ورک ایگریمنٹ تیار کرے گی اور کمپنیوں کی منتقلی کا لیگل فریم ورک بھی تجویز کرے گی، نو تشکیل شدہ کمیٹی کمپنیوں کی منتقلی کے لیے ریگولیٹری ضروریات کا جائزہ بھی لے گی۔
کمیٹی کو اپنی سفارشات پر 10 روز میں رپورٹ پیش کرنے کی ہدایت کی گئی ہے۔
