غزہ: اسرائیلی فوج نے درندگی کا مظاہرہ کرتے ہوئے غزہ کے اہم اسپتال کمال عدوان میں پاور جنریٹرز کو بھی تباہ کر دیا۔
الجزیرہ کے مطابق کمال عدوان اسپتال میں اسرائیلی افواج نے پاور جنریٹرز کو تباہ کر دیا ہے، گزشتہ ہفتے اسرائیلی حملوں کے بعد غزہ کی پٹی میں بیت لاھیا کے کمال عدوان اسپتال میں بجلی کے مرکزی جنریٹر اور دیگر سامان کو نقصان پہنچایا گیا۔
تباہ شدہ جنریٹرز کی تصاویر بھی سامنے آ گئی ہیں، یہ تصاویر ترک میڈیا انادولو کے موسیٰ سلیم نے کھینچی تھیں، جو الجزیرہ نے حاصل کی ہیں، یہ تصاویر یکم جون کو لی گئیں۔
آکسیجن، مشینوں اور دیگر سروسز کو چلانے کے لیے غزہ کے اسپتال انسانی امداد میں ملنے والے ایندھن سے چلنے والے جنریٹرز پر انحصار کرتے رہے ہیں، کیوں کہ اکتوبر میں اسرائیلی افواج نے غزہ کی پٹی کی بجلی منقطع کر دی تھی۔
کمال عدوان اسپتال میں 10 بستروں پر مشتمل ایک یونٹ ایسا ہے جہاں شدید غذائی قلت کا علاج کیا جاتا ہے، یہ شمالی غزہ کی ایسی واحد سہولت ہے۔ ڈبلیو ایچ او کی تازہ ترین رپورٹ کے مطابق اسرائیلی افواج کے حکم پر اسے گزشتہ ہفتے خالی کرا لیا گیا ہے۔
