صادق آباد: پیپلزپارٹی کے سٹی صدر خالدبن سعید کو عمران خان کی کال پر مہنگائی کے خلاف احتجاج میں شرکت اور تقریر پر عہدے سے فارغ کردیا گیا۔
تفصیلات کے مطابق پنجاب کے ضلع رحیم یار خان کی تحصیل صادق آباد پیپلزپارٹی کے سٹی صدر کو مہنگائی کے خلاف احتجاج میں تقریر کرنا مہنگا پڑ گیا۔
خالدبن سعید نے عمران خان کی کال پر ملت چوک پر مہنگائی کے خلاف احتجاج میں شرکت کی۔
اس موقع پر میاں خالد بن سعید نے بڑھتی ہوئی مہنگائی کے خلاف تقریر بھی کی تاہم پیپلزپارٹی نے تقریر کرنے کی وجہ سے میاں خالد بن سعیدکوعہدے سےہٹا دیا۔
پیپلزپارٹی نے میاں خالد بن سعید کو پارٹی ڈسپلن کی خلاف ورزی کرنے پر نوٹس بھی جاری کردیا۔
گذشتہ روز تحریک انصاف نے مہنگائی کیخلاف ملک گیر احتجاج کیا، اسلام آباد میں ایف نائن پارک، کراچی میں شارع قائدین ، لاہورمیں لبرٹی چوک اور پشاورمیں ہشت نگری پر احتجاج ہوا۔
راولپنڈی میں کمرشل مارکیٹ اورلال حویلی پراحتجاج گلگت بلتستان اورآزادکشمیرمیں بھی کپتان کی کال پر شرکا نے بڑی تعداد میں شرکت کیا اور اسکرینوں پرعمران خان کاخطاب براہ راست سنا۔
