کراچی:کورنگی میں گزشتہ روز پیپلز پارٹی کے کونسلر کی ٹارگٹ کلنگ کا واقعہ پیش آیا تھا، واقعے کی سی سی ٹی وی فوٹیج اے آر وائی نیوز نے حاصل کرلی۔
اے آر وائی نیوز کے مطابق سی سی ٹی وی فوٹیج میں دیکھا جاسکتا ہے کہ ملزمان نے چلتی موٹرسائیکل پرفائرنگ کی، عامر عباسی گولیاں لگتے ہی موٹرسائیکل سمیت سڑک پر گر پڑا۔
پولیس کا کہنا ہے کہ مقتول عامر عباسی موٹرسائیکل خود چلا رہا تھا،جسے ایک گولی کان کے پیچھے دوسری گولی گردن پر لگی، مقتول عامر گولیاں لگتے ہی موقع پر جاں بحق ہوگیا تھا۔
واضح رہے کہ کورنگی میں پیپلزپارٹی کے کونسلر کے قتل کی تحقیقات کے لیے 6 رکنی ٹیم تشکیل دے دی گئی ہے، ٹیم قتل میں ملوث ملزمان کی گرفتاری کیلئے اقدامات کرے گی۔
چیئرمین بلاول بھٹو نے کراچی میں پیپلزپارٹی کے کونسلر کے قتل کا نوٹس لیتے ہوئے کہا کہ بھٹائی کالونی سے منتخب کونسلر عامر عباسی کے قتل کی مذمت کرتاہوں، اہلخانہ کے غم میں برابرکاشریک ہوں، پوری پارٹی ان کے ساتھ کھڑی ہے اور یقین ہے ملزمان کوجلدقانون کی گرفت میں لایا جائے گا۔
ایس ایس پی کورنگی توحیدرحمان نے بتایا کہ تاجر وسیم کو 30 جون کو کورنگی نمبر 6 میں قتل کیا گیا تھا جبکہ کونسلر عامر عباسی کو گزشتہ روز نامعلوم ملزمان نے نشانہ بنایا۔
وکلا سے مذاکرات کے بعد ایس ایچ او گلستان جوہر کی تنزلی، مقدمہ بھی درج
توحیدرحمان کا کہنا تھا کہ تحقیقاتی ٹیم کی سربراہی ایس ڈی پی او لانڈھی کریں گے، ٹیم میں ایس ایچ او زمان ٹاؤن اورعوامی کالونی شامل ہیں، اس کے علاوہ 2 انسپکٹرز سمیت 4دیگر ممبران کو بھی ٹیم میں شامل کیا گیا ہے۔
