عام انتخابات سے قبل پاکستان پیپلز پارٹی کو خبیر پختونخوا سے بڑی سیاسی کامیابی مل گئی۔ اس نے صوبے کے ناراض بڑے سیاسی خاندان کو منا لیا۔
پیپلز پارٹی سے منسلک ذرائع نے بتایا کہ پارٹی کے وفد نے سابق وفاقی وزیر ارباب عالمگیر سے گزشتہ رات پشاور میں ملاقات کی، ملاقات میں عاصمہ ارباب بھی شریک تھیں۔
ذرائع نے بتایا کہ وفد کی قیادت صدر خیبر پختونخوا محمد علی شاہ باچا نے کی۔ ملاقات کے دوران ارباب عالمگیر نے وفد کو اپنے شکوے اور تحفظات سے آگاہ کیا۔
پیپلز پارٹی نے ارباب عالمگیر اور عاصمہ ارباب کے گلے شکوے دور کر دیے۔ ارباب خاندان کو ایک قومی اور ایک صوبائی اسمبلی کا ٹکٹ دیا جائے گا۔
متعلقہ: بلوچستان کے 2 بڑے الیکٹیبلز کی پیپلز پارٹی میں شمولیت سے معذرت
ذرائع کے مطابق ارباب عالمگیر کو پشاور سے قومی اسمبلی جبکہ ان کے بیٹے کو صوبائی اسمبلی کا ٹکٹ دیا جائے گا۔
ارباب عالمگیر سابق وزیر اعلیٰ خیبر پختونخوا ارباب جہانگیر کے صاحبزادے ہیں۔ ارباب عالمگیر اور عاصمہ ارباب سابق وزیر اعظم یوسف رضا گیلانی کی کابینہ میں وزیر تھے۔
چند روز قبل، پاکستان پیپلز پارٹی کے بلوچستان سے تعلق رکھنے والے ایک الیکٹیبکل مٹھا خان کاکڑ سے معاملات طے پائے تھے۔
ذرائع نے بتایا تھا کہ بلوچستان کے سابق وزیر مٹھا خان کاکڑ نے پیپلز پارٹی میں شمولیت کا فیصلہ کر لیا، وہ جلد یہ اس کا باضابطہ اعلان کریں گے، ان کی پی پی قیادت سے ملاقات ہو چکی ہے۔
سابق صوبائی وزیر مٹھا خان کاکڑ کا تعلق بلوچستان عوامی پارٹی سے ہے۔ وہ 2018 میں ژوب سے رکن بلوچستان اسمبلی منتخب ہوئے تھے۔
