اسلام آباد : اسپیکرقومی اسمبلی کے لیے پاکستان پیپلزپارٹی کے امیدوار سید خورشید شاہ نے کاغذات نامزدگی جمع کرادیے۔
تفصیلات کے مطابق پیپلزپارٹی کے سینئررہنما خورشید شاہ پارٹی رہنماؤں کے ہمراہ پارلیمنٹ ہاؤس پہنچے جہاں انہوں نے اسپیکرقومی اسمبلی کے لیے اپنے کاغذات نامزدگی جمع کرائے۔
اسپیکرقومی اسمبلی کے خورشید شاہ کے تجویز کنندگان میں ان کے دوست سید نوید قمر، رمیش لعل، شازیہ ثوبیہ، مسرت مہیسر اور شاہدہ رحمانی شامل ہیں۔
کاغذات نامزدگی جمع کرانے کے بعد میڈیا سے گفتگو کرتے ہوئے خورشید شاہ کا کہنا تھا کہ 25 سال سے پارلیمنٹ میں ہوں اور جتنے اراکین پارلیمنٹ میں آرہے ہیں سب سے اچھا تعلق ہے۔
خورشید شاہ کا کہنا تھا کہ ساری سیاسی جماعتوں کو ساتھ لے کرچلنا چاہتے ہیں، پیپلزپارٹی نے ہمیشہ جمہوریت کی بالادستی کے لیے بات کی ہے۔
اسپیکرشپ کے لیے پاکستان تحریک انصاف کے اسد قیصر اور متحدہ اپوزیشن کے خورشید شاہ کے درمیان کانٹے کے مقابلے کا امکان ظاہر کیا جا رہا ہے۔
قومی اسمبلی کے ڈپٹی اسپیکر کے عہدے پر بلوچستان سے رکن نامزد
خیال رہے کہ گزشتہ روز تحریک انصاف کی جانب سے اسپیکرقومی اسمبلی کے لیے اسد قیصراور ڈپٹی اسپیکر کے لیے قاسم سوری نے اپنے کاغذات نامزدگی سیکریٹری قومی اسمبلی کے پاس جمع کرائے تھے۔
واضح رہے کہ کل ہونے والے قومی اسمبلی کے اجلاس کے دوران خفیہ رائے شماری کے ذریعے اسپیکروڈپٹی اسپیکر کا انتخاب عمل میں لایا جائے گا۔
0
20
