اسلام آباد: ترجمان پیپلزپارٹی فیصل کریم کنڈی کا کہنا ہے کہ عجیب تحریک ہے پولیس اعلان کر رہی ہے’ہے کوئی گرفتاری دینے والا’۔
تفصیلات کے مطابق وزیرمملکت اور ترجمان پیپلزپارٹی فیصل کریم کنڈی نے پی ٹی آئی کی جیل بھرو تحریک پر عمران خان پر تنقید کرتے ہوئے کہا لیڈربنتے ہو تو خود میں لیڈر جیسےمعیارپیدا کرو، لیڈر خود گھر میں چھپ جائے تو کارکنوں کا گھبرانا بنتا ہے۔
فیصل کریم کنڈی کا کہنا تھا کہ عجیب تحریک ہےپولیس اعلان کر رہی ہے”ہے کوئی گرفتاری دینے والا ” اور رضاکارانہ گرفتاری دینے والےآزادی کی بھیک نہیں مانگتے۔
پی پی رہنما نے مزید کہا کہ زمان پارک لاہور میں کرائے پر جیل جانے والوں کی بھرتی جاری ہے۔
خیال رہے جیل بھرو تحریک کے تیسرے روز پی ٹی آئی کے لیڈرز سمیت 80 سے 90 کارکنوں نے گرفتاریاں دے دیں۔
کمیٹی چوک سب سے پہلے سابق ایم پی اے فیاض الحسن چوہان نے گرفتاری دی جبکہ زلفی بخاری،صداقت عباسی اور سابق ایم پی اے اعجاز خان جازی ، سابق ایم پی اے صداقت عباسی بھی گرفتاری دینے والوں میں شامل ہیں۔
