کراچی: پاکستان پیپلز پارٹی کے ارکان نے مزار قائد پر حاضری دی اور فاتحہ خوانی کی جبکہ قوم کو جشن آزادی کی مبارکباد بھی دی۔
تفصیلات کے مطابق سابق وزیر اعلیٰ سندھ مراد علی شاہ، نثار کھوڑو اور پیپلز پارٹی کے ارکان نے مزار قائد پر حاضری دی۔
اس موقع پر پیپلز پارٹی کی جانب سے صوبہ سندھ کے اگلے نامزد شدہ وزیر اعلیٰ مراد علی شاہ نے میڈیا سے گفتگو کرتے ہوئے کہا کہ یوم آزادی منانے کے لیے مزار قائد پر حاضری دی ہے۔
مراد علی شاہ کا کہنا تھا کہ ملک خصوصاً سندھ کی عوام کو جشن آزادی کی مبارک باد ہو۔ عوام نے ہم پر بھاری ذمہ داری عائد کر دی ہے۔
انہوں نے کہا کہ بلاول بھٹو کی قیادت میں اچھی و ایماندار کابینہ تشکیل دیں گے، ’ن لیگ نے 25 ارب تو دور 25 لاکھ بھی کراچی پر خرچ نہیں کیے، پیپلز پارٹی نے کراچی کی روشنیاں واپس لانے میں کردار ادا کیا۔
پیپلز پارٹی کے رہنما نثار کھوڑو نے میڈیا سے گفتگو کرتے ہوئے کہا کہ یوم آزادی کے لیے ہم جیے بھی اور قربانیاں بھی دی ہیں۔
انہوں نے کہا کہ پاکستان میں جمہوریت قائم ہے، خوش ہیں ہم پر امن طریقے سے جشن آزادی منا رہے ہیں۔
