اسلام آباد: قومی اسمبلی میں قائد حزب اختلاف سید خورشید شاہ نے پیپلزپارٹی کے رکن سندھ اسمبلی نواز شاہ کے خلاف احتساب عدالت کے فیصلے کو خطرناک قرار دیدیا۔
تفصیلات کے مطابق خورشید شاہ کا کہنا ہے کہ سپریم کورٹ کے چیف جسٹس علی نواز شاہ کیس کا ازخود نوٹس لیں، بلاول ہاوس میڈیا سیل کراچی میں پریس کانفرنس سے خطاب کرتے ہوئے اپوزیشن لیڈر سید خورشید شاہ نے کہا کہ پیپلزپارٹی کے رکن سندھ اسمبلی علی نواز شاہ کی ایمانداری کے ان کے سیاسی مخالفین بھی معترف ہیں، سول کورٹ سے لیکر سپریم کورٹ تک کے فیصلے علی نواز شاہ کے حق میں موجود ہے لیکن احتساب عدالت نے پیپلزپارٹی کے رہنما علی نواز شاہ کو غلط مقدمے میں سزا سنائی۔
خورشید شاہ کا کہنا تھا کہ علی نواز شاہ نے این آر او سے فائدہ اٹھانے تک سے انکار کیا ایک طرف ملک میں انصاف کا ڈھنڈورا پیٹا جارہا ہے اور دوسری طرف صاف شفاف کردار کے حامل شخص کو سزا سنائی گئی۔
خورشید شاہ کا کہنا تھا کہ نیب کورٹ کا فیصلہ خطرناک اور لوگوں کے شکوک و شبہات بڑھ گئے ہیں کہ سیاسی مخالفت پر فیصلے ہورہے ہیں، انہوں نے کہا کہ جب ملک میں عدالتیں انصاف دینا چھوڑ دیں تو خطرے کی گھنٹی ہے۔
انہوں نے سپریم کورٹ اور سندھ ہائی کورٹ کے چیف جسٹس سے علی نواز شاہ کو سنائی گئی سزا پر ازخود نوٹس لینے کا مطالبہ کرتے ہوئے کہا کہ مقتدر ادارے اس معاملے کو دیکھیں، ایک سوال کے جواب میں خورشید شاہ نے کہا کہ کراچی میں پینسٹھ فیصد امن ہوا ہے اور رینجرز و صوبائی حکومت نے اچھا کردار ادا کیا ہے۔
